លោក ពូទីន ៖ សន្តិសុខរបស់អ៊ុយក្រែន មិនអាចធានាបានទេ ដោយមិនគិតពីសន្ដិសុខរបស់រុស្ស៊ី
មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានឲ្យដឹងថា សន្តិសុខរបស់អ៊ុយក្រែន មិនអាចដោះស្រាយបានទេ ដោយមិនគិតពីសន្តិសុខរបស់រុស្ស៊ី។
លោក ពូទីន បានឲ្យដឹងនៅពេលឆ្លើយសំណួរនៅឯសម័យប្រជុំពេញអង្គនៃវេទិកាសេដ្ឋកិច្ចបូព៌ា (EEF) ថា “ទោះបីជាប្រទេសនីមួយៗមានសិទ្ធិជ្រើសរើសរបៀបធានាសន្តិសុខផ្ទាល់ខ្លួនក៏ដោយ ក៏បញ្ហាបែបនេះមិនអាចដោះស្រាយបានដោយមិនគិតពីសន្តិសុខរបស់រុស្ស៊ីដែរ”។
មេដឹកនាំរុស្ស៊ីរូបនេះ បានព្រមានថា ទាហានបរទេសណាមួយនៅអ៊ុយក្រែន នឹងក្លាយជាគោលដៅស្របច្បាប់សម្រាប់កងទ័ពរុស្ស៊ី។
និយាយអំពីទំនាក់ទំនងសក្តានុពលជាមួយប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី លោក ពូទីន បានលើកឡើងថា “វានឹងមិនអាចទៅរួចទេ” ក្នុងការឈានដល់កិច្ចព្រមព្រៀងជាមួយអ៊ុយក្រែនលើបញ្ហាសំខាន់ៗ។
លោកបានថ្លែងថា «ទោះបីជាមានឆន្ទៈនយោបាយដែលខ្ញុំសង្ស័យក៏មានការលំបាកផ្នែកច្បាប់និងបច្ចេកទេស» នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
បន្ទាប់ពីដំណើរទស្សនកិច្ចនៅប្រទេសចិន លោកពូទីនបានធ្វើដំណើរទៅកាន់ទីក្រុងកំពង់ផែ វ្ល៉ាឌីវ៉ូស្តុក ភាគខាងកើតឆ្ងាយរបស់រុស្ស៊ី ដើម្បីចូលរួម EEF លើកទី១០ ដែលនឹងត្រូវបញ្ចប់នៅថ្ងៃសៅរ៍៕
ប្រែសម្រួល ឈូក បូរ៉ា
