លោក Trump ច្រានចោលការអះអាងពី “ការលុកលុយ របស់យន្តហោះគ្មានមនុស្ស បើករបស់រុស្ស៊ី” ចូលទៅក្នុងប៉ូឡូញ ដោយថា វាអាចជាការយល់ច្រឡំ
បរទេស៖ ប្រធានាធិបតីអាមេរិក លោក Donald Trump បានបដិសេធចំពោះការចោទប្រកាន់របស់ប្រទេសប៉ូឡូញថា យន្តហោះគ្មានមនុស្សបើករុស្ស៊ី មានចេតនាបំពានដែនអាកាសរបស់ខ្លួន ក្នុងសប្តាហ៍នេះ ដោយលើកឡើងថា ឧបទ្ទវហេតុដែលត្រូវបានចោទប្រកាន់ថា “អាចជាការយល់ច្រឡំ” ។
យោងតាមសារព័ត៌មាន RT ចេញផ្សាយនៅថ្ងៃទី១១ ខែកញ្ញា ឆ្នាំ២០២៥ បានឱ្យដឹងថា ទីក្រុងមូស្គូបានច្រានចោលការចោទប្រកាន់ថា ខ្លួនបានប្រព្រឹត្ត “អំពើឈ្លានពាន” ប្រឆាំងនឹងរដ្ឋណាតូ បន្ទាប់ពីប៉ូឡូញ បានអះអាងថា បានស្ទាក់ចាប់យន្តហោះគ្មានមនុស្សបើកជាច្រើនកាលពីយប់ថ្ងៃអង្គារ។
ត្រូវបានសួរដោយអ្នកសារព័ត៌មានកាលពីថ្ងៃព្រហស្បតិ៍អំពីការអះអាងរបស់ប៉ូឡូញ លោក Trump បានឆ្លើយតបថា “អាចជាការយល់ច្រឡំ… ប៉ុន្តែទោះជាយ៉ាងណា ខ្ញុំមិនសប្បាយចិត្តចំពោះអ្វីដែលពាក់ព័ន្ធនឹងស្ថានភាពទាំងមូលនោះទេ។ ប៉ុន្តែសង្ឃឹមថាវានឹងឈានដល់ទីបញ្ចប់” ។
នាយករដ្ឋមន្ត្រីប៉ូឡូញ លោក Donald Tusk បាននិយាយថា យោធារបស់ប្រទេសប៉ូឡូញ បានតាមដានការរំលោភដែនអាកាស ដែលត្រូវបានចោទប្រកាន់យ៉ាងហោចណាស់ចំនួន 19 ក្នុងរយៈពេលប្រាំពីរម៉ោង ដោយយន្តហោះគ្មានមនុស្សបើកយ៉ាងហោចណាស់៣គ្រឿង ត្រូវបានបាញ់ទម្លាក់។ លោកបានពណ៌នាស្ថានភាពនេះថា «មិនធ្លាប់មានពីមុនមក» ហើយបានចោទក្រុងមូស្គូពីបទបង្កហេតុដោយចេតនា៕
ប្រែសម្រួលៈ ណៃ តុលា
