លោក ដូណាល់ ត្រាំ បានអះអាងថា ជនសង្ស័យដែលបាញ់សម្លាប់ Charlie Kirk គឺស្ថិតក្នុងមន្ទីរឃុំឃាំង
បរទេស៖ ប្រធានាធិបតីអាមេរិកលោក ដូណាល់ ត្រាំ បានអះអាងថា ជនជាប់ចោទជាឃាតកបាញ់សម្លាប់ សកម្មជនអភិរក្ស និយមអាមេរិក គឺ Charlie Kirk ឥឡូវនេះកំពុងជាប់ឃុំ។ លោក ដូណាល់ ត្រាំ បានប្រាប់ Fox News កាលពីថ្ងៃសុក្រថា “ខ្ញុំគិតថាជាមួយនឹងកម្រិតខ្ពស់នៃភាពប្រាកដប្រជាយើងមានគាត់នៅក្នុងមន្ទីរឃុំឃាំង” ។
យោងតាមសារព័ត៌មាន RT ចេញផ្សាយនៅថ្ងៃទី១២ ខែកញ្ញា ឆ្នាំ២០២៥ បានឱ្យដឹងថា លោក ត្រាំ បាននិយាយថា លោកត្រូវបានជូនដំណឹងអំពីការចាប់ខ្លួនជនសង្ស័យតែប៉ុន្មាននាទីមុនពេលចេញផ្សាយនេះ។ ប្រធានាធិបតីបាននិយាយថា “ជាសំខាន់ មាននរណាម្នាក់ដែលជិតស្និទ្ធនឹងគាត់ បានឲ្យគាត់មក” ដោយមិនបង្ហាញព័ត៌មានលម្អិតបន្ថែម។
សារព័ត៌មាន NBC News ក៏បានរាយការណ៍ផងដែរថា ជនសង្ស័យម្នាក់នៅ ក្នុងសំណុំរឿងឃាតកម្មដ៏ល្បីមួយ ត្រូវបានចាប់ខ្លួនដោយស្រង់ប្រភពពីមន្ត្រីអនុវត្តច្បាប់ជាន់ខ្ពស់។ ជននោះត្រូវបានគេរាយការណ៍ថាបានបញ្ជូនទៅប៉ូលិសដោយសមាជិកគ្រួសារម្នាក់ ដែលបានឃើញរូបថត របស់គាត់ចេញដោយអាជ្ញាធរ។
ការអនុវត្តច្បាប់របស់សហរដ្ឋអាមេរិកមិន បានបញ្ជាក់ជាផ្លូវការអំពីការចាប់ខ្លួន ឬបង្ហាញអត្តសញ្ញាណរបស់ជនសង្ស័យ នោះទេ។ FBI បានចេញផ្សាយរូបភាព នៃជនសង្ស័យ ដែលត្រូវបានចោទប្រកាន់កាលពីថ្ងៃព្រហស្បតិ៍ គឺ បុរសម្នាក់ពាក់វ៉ែនតាការពារកំដៅថ្ងៃ ពាក់មួកខ្មៅ និងអាវខ្មៅដៃវែងដែលមានទង់ជាតិអាមេរិក។ ទីភ្នាក់ងារក៏បានផ្តល់រង្វាន់ចំនួន ១សែនដុល្លារ សម្រាប់ព័ត៌មានដែលនាំទៅដល់ការកំណត់អត្តសញ្ញាណ និងការចាប់ខ្លួនឃាតក។
ប្រែសម្រួលៈ ណៃ តុលា
