ក្រុមហាម៉ាស់ ៖ ការចរចាផ្លាស់ប្តូរអ្នកទោស ត្រូវបានផ្អាក បន្ទាប់ពីការវាយប្រហារ របស់អ៊ីស្រាអែល លើទីក្រុងដូហា
ហ្គាហ្សា ៖ ក្រុមហាម៉ាស់ បានឲ្យដឹងថា ខ្លួនបានផ្អាកកិច្ចពិភាក្សាស្តីពីការផ្លាស់ប្តូរអ្នកទោសជាមួយអ៊ីស្រាអែល បន្ទាប់ពីបានចោទប្រកាន់អ៊ីស្រាអែលថា បានកំណត់គោលដៅ នៃគណៈប្រតិភូចរចារបស់ខ្លួននៅក្នុងរដ្ឋធានីដូហា ប្រទេសកាតាកាលពីសប្តាហ៍មុន នេះបើយោតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Tahir al-Nono មន្ត្រីជាន់ខ្ពស់ក្រុមហាម៉ាស់បានឲ្យដឹងនៅក្នុងសេចក្តីថ្លែងការណ៍មួយថា “ការចរចាមិនអាចបន្តបាននោះទេ ប្រសិនបើគណៈប្រតិភូ ទទួលខុសត្រូវចំពោះពួកគេត្រូវបាន វាយប្រហារនៅក្នុងប្រទេស ដែលដើរតួជាអ្នកសម្របសម្រួល”។
ក្រុមហាម៉ាស់បានឲ្យដឹងថា ការវាយប្រហារតាមអាកាស របស់អ៊ីស្រាអែល កាលពីថ្ងៃអង្គារសប្តាហ៍ មុនបានវាយប្រហារ ទៅលើបរិវេណលំនៅដ្ឋាន ក្នុងទីក្រុងដូហា ដែលប្រើប្រាស់ដោយមេដឹកនាំរបស់ខ្លួន ខណៈដែលពួកគេកំពុងពិភាក្សាអំពីសំណើបទឈប់បាញ់ ដែលគាំទ្រដោយសហរដ្ឋអាមេរិក។ ក្រុមនេះបាននិយាយថា គណៈប្រតិភូដែលដឹកនាំដោយមន្ត្រីជាន់ខ្ពស់របស់ហាម៉ាស់ លោក Khalil al-Hayya បានរួចជីវិត ប៉ុន្តែសមាជិកក្រុមហាម៉ាស់ ៥ នាក់ និងមន្ត្រីសន្តិសុខកាតាម្នាក់ ត្រូវបានសម្លាប់។
លោក Al-Nono បានចោទប្រកាន់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ពីការរារាំងកិច្ចខិតខំប្រឹងប្រែង ដើម្បីឈានដល់ទាំងបទ ឈប់បាញ់ និងការផ្លាស់ប្តូរអ្នកទោស។ លោកបានព្រមានថា ការវាយប្រហាររបស់អ៊ីស្រាអែល កាន់តែខ្លាំងទៅលើអាគារលំនៅឋានក្នុងតំបន់ហ្គាហ្សា អាចបង្កគ្រោះថ្នាក់ដល់អ្នកចាប់ជនជាតិអ៊ីស្រាអែលដែលឃុំខ្លួននៅទីនោះ។
លោកបានលើកឡើងថា “ដំណោះស្រាយសមហេតុផល តែមួយគត់ គឺសម្រាប់សហគមន៍អន្តរជាតិក្នុងការចេញ និងអនុវត្តការសម្រេចចិត្ត ដើម្បីបញ្ឈប់សង្រ្គាមនេះ” ។ លោក Al-Nono ក៏បានច្រានចោលដំណើរទស្សនកិច្ចរបស់រដ្ឋមន្ត្រីការបរទេសអាមេរិក លោក Marco Rubio ទៅកាន់ប្រទេសអ៊ីស្រាអែល កាលពីថ្ងៃអាទិត្យ ដោយថា ក្រុមហាម៉ាស់រំពឹងថា នឹងមិនមានការផ្លាស់ប្ដូរនៅក្នុងជំហររបស់អ៊ីស្រាអែលឡើយ។
ការអត្ថាធិប្បាយនេះបានកើតឡើងនៅពេល ដែលការវាយប្រហារតាមអាកាសរបស់អ៊ីស្រាអែលបានវាយលុកអគារលំនៅដ្ឋាននៅទីក្រុងហ្គាហ្សា ក្នុងប៉ុន្មានថ្ងៃថ្មីៗនេះ ដោយបានសម្លាប់មនុស្សរា ប់សិបនាក់ នេះបើយោងតាមមន្ត្រីសុខាភិបាលប៉ាឡេស្ទីន។ អ៊ីស្រាអែលឲ្យដឹងថា ប្រតិបត្តិការរបស់ខ្លួនផ្តោត លើហេដ្ឋារចនាសម្ព័ន្ធ និងក្រុមអ្នកប្រយុទ្ធហាម៉ាស់ ខណៈដែលប៉ាឡេស្ទីនបានឲ្យដឹងថា ជនស៊ីវិលកំពុងទទួលរង ការវាយប្រហារយ៉ាងខ្លាំង៕
