កាតា បញ្ជាក់ថា ការវាយប្រហារ របស់អ៊ីស្រាអែល នឹងមិនបញ្ឈប់កិច្ចខិតខំប្រឹងប្រែង សម្រុះសម្រួល សម្រាប់សន្តិភាពតំបន់ហ្គាហ្សានោះទេ
ដូហា៖ នាយករដ្ឋមន្ត្រីកាតា និងរដ្ឋមន្ត្រីការបរទេស Sheikh Mohammed bin Abdulrahman bin Jassim Al-Thani បានឲ្យដឹងថា ការវាយប្រហារនាពេលថ្មីៗនេះរបស់អ៊ីស្រាអែល លើទីក្រុងដូហា នឹងមិនរារាំងប្រទេសកាតា អេហ្ស៊ីប និងសហរដ្ឋអាមេរិក ពីការបន្តកិច្ចខិតខំប្រឹងប្រែង សម្របសម្រួលរបស់ពួកគេ ដើម្បីបញ្ចប់សង្រ្គាម នៅក្នុងតំបន់ហ្គាហ្សានោះទេ។
យោងតាម QNA នាយករដ្ឋមន្ត្រីកាតា បានធ្វើការកត់សម្គាល់ក្នុងអំឡុង ពេលកិច្ចប្រជុំត្រៀមជាមួយរដ្ឋមន្ត្រីការបរទេស មកពីប្រទេសអារ៉ាប់ និងឥស្លាម ដែលបានធ្វើឡើងនៅមុនកិច្ចប្រជុំកំពូលអារ៉ាប់-អ៊ីស្លាមជាបន្ទាន់ ដែលគ្រោងធ្វើនៅថ្ងៃចន្ទ ដើម្បីដោះស្រាយការវាយប្រហារ របស់អ៊ីស្រាអែល។
រដ្ឋមន្ត្រីការបរទេសបានពិភាក្សាលើសេចក្តីព្រាង សេចក្តីថ្លែងការមួយ ស្តីពីការវាយប្រហារ កាលពីថ្ងៃអង្គារដោយអ៊ីស្រាអែល លើអគារលំនៅដ្ឋានក្នុងទីក្រុងដូហា ដែលមានមេដឹកនាំ ក្រុមហាម៉ាស់ជាច្រើននៅទីនោះ នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។
នៅក្នុងកិច្ចពិភាក្សារបស់គាត់ លោក Al-Thani បានសង្កត់ធ្ងន់ថា តំបន់មិនអាចសម្រេចបាននូវសន្តិភាព និងសន្តិសុខទូលំទូលាយទេ លុះត្រាតែប្រជាជនប៉ាឡេស្ទីនទទួលបានសិទ្ធិស្របច្បាប់របស់ពួកគេ ។ អ៊ីស្រាអែល បានបើកការវាយប្រហារ តាមផ្លូវអាកាសដែលមិនធ្លាប់មាន ពីមុនមកនៅក្នុងរដ្ឋធានីកាតា កាលពីថ្ងៃអង្គារ ដោយផ្តោតលើអគារមួយដែលក្រុមមន្ត្រីហាម៉ាស់ កំពុងជួបប្រជុំគ្នាដើម្បីពិភាក្សា អំពីសំណើបទឈប់បាញ់ចុងក្រោយ ដែលដាក់ចេញដោយសហរដ្ឋអាមេរិក។
គួរបញ្ជាក់ថា សមាជិកក្រុម ហាម៉ាស់ ៥ នាក់ និងមន្ត្រីសន្តិសុខកាតាម្នាក់ត្រូវបានសម្លាប់ក្នុងអំឡុងពេលធ្វើកូដកម្ម ខណៈដែលសមាជិកសំខាន់ៗ នៃក្រុមចរចាហាម៉ាស់ បានរួចជីវិត៕
