ការទម្លាក់ពន្ធគយ ១៥% លើរថយន្តពីប្រទេសជប៉ុន របស់លោក ដូណាល់ ត្រាំ ចូលជាធរមាននៅថ្ងៃអង្គារនេះ
វ៉ាស៊ីនតោន៖ រដ្ឋាភិបាលសហរដ្ឋអាមេរិកបានឲ្យដឹងថា ការទម្លាក់ពន្ធរបស់ប្រធានាធិបតី អាមេរិកលោក ដូណាល់ ត្រាំ ចំនួន ១៥ ភាគរយលើរថយន្តពីប្រទេសជប៉ុន ចូលជាធរមាន នៅថ្ងៃអង្គារនេះ នេះបើយោងតាមការចុះផ្សាយ របស់ទីភ្នាក់ងារ សារព័ត៌មានក្យូដូជប៉ុន។
អត្រាពន្ធរបស់សហរដ្ឋអាមេរិក សម្រាប់រថយន្ត ដែលមានដើមកំណើតពីបរទេសបានកើនឡើងដល់ ២៧.៥ ភាគរយ បន្ទាប់ពីលោក ត្រាំ បានដាក់ កាលពីខែមេសា នូវពន្ធលើរថយន្តបន្ថែម លើមូលដ្ឋានសន្តិសុខជាតិ ដោយបានដាក់លើក្រុមហ៊ុន ផលិតរថយន្តជប៉ុន និងក្រុមហ៊ុនផលិតផ្សេងទៀត។
ពន្ធដែលបានកាត់បន្ថយ គឺជាផ្នែកមួយនៃកិច្ចព្រមព្រៀងពាណិជ្ជកម្មដែលរដ្ឋបាលលោក ត្រាំ បានធ្វើកាលពីថ្ងៃទី ២២ ខែកក្កដា ជាមួយប្រទេសជប៉ុន ដែលជាថ្នូរនឹងការប្តេជ្ញាចិត្តក្នុងការវិនិយោគយ៉ាងច្រើននៅក្នុងសហរដ្ឋអាមេរិក និងបង្កើនការនាំចូលផលិតផលកសិកម្មរបស់អាមេរិកក្នុងអំឡុងពេលអាណត្តិទីពីរមិនជាប់ៗគ្នារបស់ប្រធានាធិបតីអាមេរិករូបនេះ។
លោក ដូណាល់ ត្រាំ បានចុះហត្ថលេខា លើបទបញ្ជាប្រតិបត្តិមួយកាលពីថ្ងៃទី ៤ ខែកញ្ញា ដោយអនុវត្តជាផ្លូវការ នូវកិច្ចព្រមព្រៀងពាណិជ្ជកម្ម ដែលបានផ្តល់ ការអនុគ្រោះពិសេសដល់ប្រទេសជប៉ុន លើអ្វីដែលលោកហៅ ថាពន្ធគយទៅវិញទៅមក។ នៅថ្ងៃទី ៧ ខែសីហា អត្រាពន្ធលើប្រទេសជាក់លាក់ ដែលបានកែប្រែរបស់លោក ត្រាំ សម្រាប់ទំនិញពីដៃគូពាណិជ្ជកម្មរាប់សិបរបស់សហរដ្ឋអាមេរិក បានចូលជាធរមាន។
បច្ចុប្បន្ននេះ សហរដ្ឋអាមេរិកបានដាក់ពន្ធ ១៥ ភាគរយលើការនាំចូលភាគច្រើនពីប្រទេសជប៉ុន ធ្លាក់ចុះពី ២៤ ភាគរយ ឬ ២៥ ភាគរយដែលលោក ត្រាំ បានគំរាមកំហែង មុនកិច្ចព្រមព្រៀង។ លើសពីនេះ ក្រុមពាណិជ្ជកម្ម របស់គាត់បាន យល់ព្រមថា ការនាំចូលពីប្រទេសជប៉ុន ជាមួយនឹងពន្ធដែលមានស្រាប់ចាប់ពី ១៥ ភាគរយ ឬខ្ពស់ជាងនេះ នឹងមិនប្រឈមមុខ នឹងការបង់ពន្ធបន្ថែមនោះទេ ហើយការយកពន្ធលើទំនិញផ្សេងទៀតនឹងត្រូវកំណត់ត្រឹម ១៥ ភាគរយ៕
