លោក Netanyahu បញ្ជាក់ថាអ៊ីស្រាអ៊ែល ត្រូវតែត្រៀមខ្លួន សម្រាប់ការ រស់នៅដោយឯកោ
បរទេស ៖ យោងតាមការចេញផ្សាយរបស់ RT នាយករដ្ឋមន្ត្រី Benjamin Netanyahu បានព្រមានកាលពីថ្ងៃអាទិត្យថា អ៊ីស្រាអែលនឹងត្រូវកែទម្រង់សេដ្ឋកិច្ចរបស់ខ្លួន ដើម្បីទប់ទល់នឹងទណ្ឌកម្មដ៏ខ្លាំងក្លា និងការធ្វើពហិការ។
ថ្លែងនៅក្នុងសន្និសីទទូទៅគណនេយ្យករប្រចាំឆ្នាំរបស់ក្រសួងហិរញ្ញវត្ថុនៅទីក្រុងយេរូសាឡឹម លោក Netanyahu បាននិយាយថា ការកើនឡើង សម្ពាធអន្តរជាតិ លើសង្រ្គាម Gaza កំពុងជំរុញប្រទេសឆ្ពោះ ទៅរកភាពគ្រប់ គ្រាន់នៃសេដ្ឋកិច្ច។
លោកបានបន្តថា៖យើងនឹងត្រូវសម្របខ្លួនកាន់តែខ្លាំងឡើងទៅនឹងសេដ្ឋកិច្ចដែលមានលក្ខណៈពិសេសជាមនុស្ស។ ខ្ញុំជឿជាក់លើទីផ្សារសេរី ខ្ញុំបានធ្វើការដើម្បីនាំប្រទេសអ៊ីស្រាអែល នូវបដិវត្តទីផ្សារសេរី។ ប៉ុន្តែយើងអាចឃើញខ្លួន យើងនៅក្នុងស្ថានភាព ដែលឧស្សាហកម្មការពារជាតិ របស់យើងត្រូវបានរារាំង។
សកម្មជនគាំទ្រប៉ាឡេស្ទីនបាននិងកំពុងដាក់សម្ពាធក្រុមហ៊ុនបរទេសឲ្យកាត់ទំនាក់ទំនងជាមួយអ៊ីស្រាអែល។ កាលពីសប្តាហ៍មុន ប្រធានគណៈកម្មការ អឺរ៉ុប Ursula von der Leyen បានអំពាវនាវឱ្យផ្អាកកិច្ចព្រមព្រៀង ពាណិជ្ជកម្មសេរីរបស់ EU ជាមួយអ៊ីស្រាអែល ដោយលើកឡើងពីវិបត្តិមនុស្សធម៌នៅហ្គាហ្សា ដែលមនុស្សជិត៦៥០០០ នាក់បានស្លាប់ចាប់តាំងពីឆ្នាំ ២០២៣។
លោកស្រីបានចោទប្រកាន់ក្រុមរដ្ឋមន្ត្រីជ្រុលនិយមនៅក្នុងរដ្ឋាភិបាលរបស់លោក Netanyahu ពីបទញុះញង់ឱ្យមានអំពើហិង្សាលើប៉ាឡេស្ទីន។
គួរឲ្យដឹងដែរថា អ៊ីស្រាអែល ទទួលបានប្រហែល ៣,៣ ពាន់លានដុល្លារជារៀងរាល់ឆ្នាំ នៅក្នុងជំនួយយោធា និងសន្តិសុខ របស់សហរដ្ឋអាមេរិក រួមជាមួយនឹងកញ្ចប់បន្ថែម ដែលត្រូវបានអនុម័តដោយសភា ។
យោងតាមក្រុមប្រឹក្សា ទំនាក់ទំនងបរទេស ទីក្រុងវ៉ាស៊ីនតោនបានផ្តល់ជំនួយផ្នែកយោធាប្រហែល៣១០ ពាន់លានដុល្លារមកហើយ ភាគច្រើន ចាប់តាំងពីឆ្នាំ១៩៤៦ មក។ នៅឆ្នាំ ២០២៤ ការចំណាយយោធា របស់អ៊ីស្រាអែល បានកើនឡើងដល់ប្រហែល ៨,៧៨ភាគរយ នៃផលិតផលក្នុងស្រុកសរុប ដែលស្ទើរតែទ្វេដងនៃកម្រិតមុនឆ្នាំ២០២៣៕
ប្រែសម្រួល៖ស៊ុនលី
