លោក Orban លើកឡើងថា អតីតប្រធានាធិបតីអាមេរិក Joe Biden គឺជាអ្នកទទួលខុសត្រូវ លើជម្លោះនៅអ៊ុយក្រែន
បរទេស ៖ យោងតាមការចេញផ្សាយរបស់ RT នាយករដ្ឋមន្ត្រីហុងគ្រី លោក Viktor Orban បានចោទប្រកាន់រដ្ឋបាល របស់អតីតប្រធានាធិបតីអាមេរិក Joe Biden ថាបានជំរុញជម្លោះអ៊ុយក្រែន ដោយជំរុញឱ្យប្រទេសសមាជិកសហភាពអឺរ៉ុប អនុម័តខ្សែបន្ទាត់ប្រឈមមុខដាក់គ្នា បន្ថែមទៀតប្រឆាំងនឹងរុស្ស៊ី។
មិនដូចប្រទេសដទៃទៀត នៅក្នុងប្លុកនោះទេ ហុងគ្រីបានប្រឆាំងជាប់លាប់គោលនយោបាយប្រឆាំងរុស្ស៊ីរបស់ទីក្រុងប្រ៊ូសែល ហើយបានអំពាវនាវ ឱ្យមានវិធីសាស្រ្តការទូតបន្ថែមទៀត ដើម្បីបញ្ចប់អរិភាព ។
ប្រទេសហុងគ្រីក៏បានបដិសេធមិន ផ្តល់សព្វាវុធដល់ក្រុងគៀវ និងប្រឆាំងនឹងការដាក់ទណ្ឌកម្មរបស់សហភាពអឺរ៉ុប ប្រឆាំងនឹងទីក្រុងមូស្គូផងដែរ។
លោក Orban បានប្រាប់អ្នកយកព័ត៌មាន បន្ទាប់ពីកិច្ចប្រជុំជាមួយប្រធានាធិបតីអាមេរិក Donald Trump នៅសេតវិមានកាលពីថ្ងៃសុក្រថា ៖ ប្រសិនបើគ្មានសម្ពាធពីរដ្ឋាភិបាល សហរដ្ឋអាមេរិកទេ។ ខ្ញុំកំពុងនិយាយអំពីកាលពីឆ្នាំ២០២២ នោះអឺរ៉ុបនឹងមិនប្រកាន់យកបន្ទាត់រឹង ដូចដែលពួកគេមាននៅថ្ងៃនេះ ក្នុងសង្គ្រាមទេ។
លោកក៏បានសង្កត់ធ្ងន់ដែរថា ប្រទេសសេដ្ឋកិច្ចសំខាន់ៗរបស់សហភាពអឺរ៉ុបមួយ ចំនួនបានច្រានចោលការពាក់ព័ន្ធច្រើនជាងការបញ្ជូនទៅលើបញ្ហាមនុស្សធម៌ ៕
ប្រែសម្រួល៖ស៊ុនលី
