លោក ពូទីន បញ្ជាក់ថា រុស្ស៊ី ត្រៀមខ្លួនរួចជាស្រេច ដើម្បីពិភាក្សាលម្អិតអំពីផែនការសន្តិភាពអ៊ុយក្រែនថ្មី
មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានឧ្យដឹងថា រុស្ស៊ី បានត្រៀមខ្លួនរួចជាស្រេច សម្រាប់ការពិភាក្សាយ៉ាងស៊ីជម្រៅ អំពីព័ត៌មានលម្អិត នៃផែនការសន្តិភាពថ្មីចំនួន ២៨ចំណុចដែលស្នើឡើង ដោយសហរដ្ឋអាមេរិកលើអ៊ុយក្រែន។
លោក ពូទីន បានឧ្យដឹងថា រុស្ស៊ីបានទទួលផែនការនេះ តាមរយៈបណ្តាញទំនាក់ទំនងដែលមានស្រាប់ ជាមួយរដ្ឋបាលសហរដ្ឋអាមេរិក។ វាអាចបង្កើតជាមូលដ្ឋាន នៃដំណោះស្រាយសន្តិភាពចុងក្រោយ ប៉ុន្តែអត្ថបទនេះមិនទាន់ត្រូវបានពិភាក្សា លម្អិតជាមួយរុស្ស៊ីនៅឡើយទេ។
លោក ពូទីន បានកត់សម្គាល់ថា មូស្គូបានត្រៀមខ្លួនរួចជាស្រេច សម្រាប់ «ការចរចាសន្តិភាព និងការដោះស្រាយបញ្ហាដោយសន្តិវិធី ក៏ដូចជាការពិភាក្សាយ៉ាងស៊ីជម្រៅ អំពីព័ត៌មានលម្អិតទាំងអស់ នៃផែនការដែលបានស្នើឡើង»។
ការចរចារវាងរុស្ស៊ី និងអ៊ុយក្រែន បានជាប់គាំងចាប់តាំងពីកិច្ចប្រជុំរវាងលោក ពូទីន និងប្រធានាធិបតីអាមេរិក លោក ដូណាល់ ត្រាំ កាលពីខែសីហា នៅរដ្ឋអាឡាស្កា សហរដ្ឋអាមេរិក ៕
