កាសែត New York Times ៖ មនុស្ស៨០នាក់ បានស្លាប់ នៅក្នុងប្រតិបត្តិការ ដែលអាមេរិកសម្រុកចូលចាប់ខ្លួន ប្រធានាធិបតី Nicolas Maduro
បរទេស៖ កាសែត New York Times បានរាយការណ៍ កាលពីថ្ងៃអាទិត្យ ដោយដកស្រង់សម្តី មន្ត្រីជាន់ខ្ពស់វេណេស៊ុយអេឡាម្នាក់ថា ចំនួនអ្នកស្លាប់ពីការវាយឆ្មក់ របស់សហរដ្ឋអាមេរិក ដើម្បីចាប់ពង្រត់ប្រធានាធិបតី Nicolas Maduro បានកើនឡើងដល់យ៉ាងហោចណាស់ ៨០ នាក់ ដែលរួមមានទាំងទាហាន និងជនស៊ីវិល ។
យោងតាមសារព័ត៌មាន RT ចេញផ្សាយនៅថ្ងៃទី៥ ខែមករា ឆ្នាំ២០២៦ បានឱ្យដឹងថា រដ្ឋមន្ត្រីការពារជាតិវេណេស៊ុយអេឡា លោក Vladimir Padrino Lopez បានបញ្ជាក់ថា កងកម្លាំងអាមេរិក បានសម្លាប់ “ផ្នែកធំ” នៃផ្នែកសន្តិសុខរបស់លោក Maduro នៅក្នុងប្រតិបត្តិការនេះ ដោយមិនបានបង្ហាញតួលេខឡើយ ។ មន្ត្រីវេណេហ្ស៊ុយអេឡា ក៏បានចោទប្រកាន់សហរដ្ឋអាមេរិកថា បានវាយលុកតំបន់ជនស៊ីវិល ប៉ុន្តែមិនទាន់បានប្រកាសអំពី ចំនួនអ្នកស្លាប់ជាផ្លូវការនៅឡើយទេ។
ទន្ទឹមនឹងនេះ មន្ត្រីគុយបាបាននិយាយថា ពលរដ្ឋរបស់ខ្លួនចំនួន ៣២ នាក់ រួមទាំងបុគ្គលិកយោធា ត្រូវបានសម្លាប់នៅក្នុងការវាយប្រហារនេះ។ ប្រធានាធិបតីគុយបាលោក Miguel Diaz-Canel បានប្រកាសថា ថ្ងៃទី ៥ និងទី ៦ ខែមករា ជាថ្ងៃកាន់ទុក្ខជាផ្លូវការ។
រដ្ឋមន្ត្រីការបរទេសវេណេស៊ុយអេឡា លោក Yvan Gil Pinto បានចូលរួមគោរពវិញ្ញាណក្ខន្ធដល់ជនគុយបាដែលបានទទួលមរណភាព ដែលបាន “លះបង់ជីវិត” ខណៈពេលដែលកំពុងបំពេញ ភារកិច្ចជាផ្នែកនៃកិច្ចសហប្រតិបត្តិការ និងបេសកកម្មការពារជាតិ ខណៈដែលលោកពិពណ៌នាការវាយឆ្មក់ របស់សហរដ្ឋអាមេរិកថា ជាការវាយប្រហារ “ឧក្រិដ្ឋកម្ម និងដ៏អាក្រក់”។
យ៉ាងណាក៏ដោយ ប្រធានាធិបតីអាមេរិក លោក ដូណាល់ ត្រាំ បាននិយាយថា គ្មានទាហានអាមេរិកណាម្នាក់ត្រូវបានសម្លាប់ទេ ខណៈលោកបានលើកឡើងថា សមាជិកសេវាកម្មមួយចំនួនប្រហែលជារងរបួស។ មន្ត្រីអាមេរិកពីរនាក់ដែលមិនបញ្ចេញឈ្មោះបានប្រាប់កាសែត New York Times ថា ទាហានមួយចំនួនបានរងរបួសក្នុងអំឡុងពេលប្រតិបត្តិការដើម្បីចាប់ខ្លួន Maduro និងភរិយា៕
ប្រែសម្រួលៈ ណៃ តុលា
