ប្រធានាធិបតី វេណេស៊ុយអេឡា លោក Nicolas Maduro បានលើកឡើង ក្នុងតុលាការអាមេរិកថា លោកមិនមានទោសអ្វីនោះទេ
បរទេស: ប្រធានាធិបតីវេណេស៊ុយអេឡា នៅថ្ងៃចន្ទលោក Nicolas Maduro ដែលត្រូវបានផ្តួលរំលំ បានលើកឡើងថា លោកមិនមានទោសអ្វីនោះទេ ចំពោះការចោទប្រកាន់ពីបទគ្រឿងញៀន បន្ទាប់ពីការចាប់ខ្លួនរបស់អាមេរិក ដ៏គួរឱ្យភ្ញាក់ផ្អើល បានធ្វើឱ្យមេដឹកនាំ ពិភពលោកភ្ញាក់ផ្អើល និងធ្វើឱ្យមន្ត្រីនៅទីក្រុងការ៉ាកាស ប្រញាប់ប្រញាល់ ប្រមូលផ្តុំគ្នា។
យោងយាមសារព័ត៌មាន រ៉យទ័រ ចេញផ្សាយនៅថ្ងៃទី៦ ខែមករា ឆ្នាំ២០២៦ បានឲ្យដឹងថា លោក Maduro អាយុ ៦៣ ឆ្នាំ បាននិយាយតាមរយៈអ្នកបកប្រែ មុនពេលត្រូវបានកាត់ផ្តាច់ ដោយចៅក្រមស្រុកអាមេរិក Alvin Hellerstein នៅក្នុងតុលាការសហព័ន្ធ Manhattan។
ភរិយារបស់លោក Maduro គឺលោកស្រី Cilia Flores ក៏បានលើកឡើងថា មិនមានទោសផងដែរ។ កាលបរិច្ឆេទសវនាការ បន្ទាប់ត្រូវបានកំណត់នៅថ្ងៃទី ១៧ ខែមីនា។
អ្នកតវ៉ារាប់សិបនាក់ ទាំងគាំទ្រ និងប្រឆាំង លោក Maduro បានប្រមូលផ្តុំគ្នានៅខាងក្រៅ តុលាការ មុនពេលសវនាការ រយៈពេលកន្លះម៉ោង ។
ប៉ុន្មានម៉ោងក្រោយមក នៅទីក្រុងការ៉ាកាស ក្នុងប្រទេសវ៉េណេស៊ុយអេឡា អនុប្រធានាធិបតីរបស់លោក Maduro គឺលោកស្រី Delcy Rodriguez បានស្បថ ចូលកាន់តំណែង ជាប្រធានាធិបតីបណ្តោះអាសន្ន របស់ប្រទេស វេណេស៊ុយអេឡា ជាមួយនឹងពាក្យគាំទ្រលោក Maduro ប៉ុន្តែមិនមានការចង្អុល បង្ហាញថា លោកស្រីនឹងប្រឆាំង នឹងចលនា របស់សហរដ្ឋអាមេរិកនោះទេ ។
ប្រែសម្រួល: ណៃ តុលា
