បទវិភាគ ៖ ត្រង់ស្វូរម៉ាទ័រ ដែល”ផលិតដោយប្រទេសចិន” បានជំរុញប្រព័ន្ធគណនាសកល
បច្ចុប្បន្ននេះ កិច្ចការកសាងប្រព័ន្ធគណនាបញ្ញាសិប្បនិម្មិតសកលបានឈានចូលដំណាក់កាលវិវឌ្ឍរីកចម្រើនយ៉ាងផុលផុស ការផ្គត់ផ្គង់ថាមពលអគ្គិសនីដែលមានថាមពលខ្ពស់ និងមានស្ថេរភាពខ្ពស់បានក្លាយជា”ខ្សែជីវិត”នៃប្រព័ន្ធគណនា ហើយត្រង់ស្វូរម៉ាទ័រ (Transformers)នៃឧបករណ៍ថាមពលអគ្គិសនីកំពុងត្រូវបានលើកកម្ពស់ជាលំដាប់ថ្នាក់ ដើម្បីក្លាយជាស្នូលនៃហេដ្ឋារចនាសម្ព័ន្ធប្រព័ន្ធគណនា។ អ្នកសារព័ត៌មានបានចុះសិក្សានិងស្វែងយល់ការងារនៅក្នុងខេត្តក្វាងទុង និងជាំងស៊ូជាដើមនៃប្រទេសចិនដោយបានរកឃើញថា រោងចក្រផលិតត្រង់ស្វូរម៉ាទ័រជាច្រើនកំពុងដំណើរ ការពេញសមត្ថភាព រួចហើយ ក្នុងនោះដែរ រោងច្រកមួយចំនួនមានការបញ្ជាទិញពីមជ្ឈមណ្ឌលទិន្នន័យត្រូវបានកក់រហូតដល់ឆ្នាំ ២០២៧ ។
ការកើនឡើងយ៉ាងផុលផុស នៃមជ្ឈមណ្ឌលប្រព័ន្ធគណនាបញ្ញាសិប្បនិម្មិតសកល បានធ្វើឱ្យត្រង់ស្វូរម៉ាទ័រក្លាយជាធនធានដ៏កម្រ។ លោកស្រីLi Xia អ្នកទទួលខុសត្រូវផ្នែកទីផ្សារ នៃក្រុមហ៊ុនផលិតឧបករណ៍អគ្គិសនីមួយក្នុងទីក្រុង Foshan ខេត្តក្វាងទុង បានថ្លែងថា នាពេលបច្ចុប្បន្នមានការ បញ្ជាទិញច្រើនណាស់ យើងរំពឹងថា ប្រាក់ចំណូលពីក្រៅប្រទេសនឹងកើនឡើង ដល់៥០% ឬច្រើនជាងនេះ ។
យោងតាមទិន្នន័យបានបង្ហាញថា ក្នុងវិស័យត្រង់ស្វូរម៉ាទ័រ មានសហគ្រាសពាក់ព័ន្ធប្រមាណ៣០០០សហគ្រាស នៅក្នុងប្រទេសចិន។ នៅឆ្នាំ ២០២៥ ទំហំសរុបនៃការនាំចេញត្រង់ស្វូរម៉ាទ័ររបស់ប្រទេសចិនបានឈានដល់៦៤,៦ពាន់លានយាន់ប្រាក់ចិន ដែលកើនឡើងជិត ៣៦%បើប្រៀបធៀបនឹងឆ្នាំ ២០២៤។
លោក Cai Yiqing អគ្គលេខាធិការសាខាបរិក្ខារអគ្គិសនីនៃសហព័ន្ធថាមពលអគ្គិសនីប្រទេសចិនបានលើកឡើងថា ប្រទេសចិនបានក្លាយជាប្រទេសផលិតត្រង់ស្វូរម៉ាទ័រធំជាងគេបំផុតលើពិភពលោក ដែលបានកសាងរួចរាល់នូវប្រព័ន្ធផលិតត្រង់ស្វូរម៉ាទ័រដ៏ពេញលេញបំផុតនៅលើពិភពលោក និងមានកម្លាំងជាក់ស្តែងដែលប្រកបដោយភាពស្វ័យម្ចាស់ការ និងអាចគ្រប់គ្រងបានលើខ្សែសង្វាក់ឧស្សាហកម្មទាំងមូល ដែលមានសមត្ថភាពផលិតប្រហែល៦០% នៃចំនួនសរុបទូទាំងពិភពលោក។
នៅពីក្រោយការកើនឡើងយ៉ាងខ្លាំងនៃការបញ្ជាទិញត្រង់ស្វូរម៉ាទ័រគឺជាការកើនឡើងគួរឱ្យកត់សម្គាល់នៃការប្រើប្រាស់ថាមពលអគ្គិសនីសម្រាប់ប្រព័ន្ធគណនា។ បច្ចុប្បន្ននេះ ការកសាងមជ្ឈមណ្ឌលប្រព័ន្ធគណនា និងចង្កោមកុំព្យូទ័រទំនើបៗនៃប្រទេសចិនកំពុងបង្កើនល្បឿនដោយគ្រប់ជ្រុងជ្រោយ ក្រៅពីនេះ គម្រោងដែលតំបន់ភាគខាងលិចនាំចូលតម្រូវការខាងប្រព័ន្ធគណនាពីតំបន់ខាងកើតត្រូវបានជំរុញយ៉ាងស៊ីជម្រៅ ។ ក្នុងនាមជា”បេះដូង”នៃថាមពលអគ្គិសនី ត្រង់ស្វូរម៉ាទ័របានទទួលភារកិច្ចជាទម្ងន់ ។ នៅខេត្តក្វាងទុង នៅឆ្នាំ២០២៥ ការប្រើប្រាស់អគ្គិសនីនៃមជ្ឈមណ្ឌលទិន្នន័យរបស់ខេត្តទាំងមូលបានកើនឡើងជិត៣០%បើប្រៀបធៀបនឹងឆ្នាំ២០២៤ ក្នុងនោះដែរ ល្បឿនកំណើននៃការប្រើប្រាស់អគ្គិសនីនៃប្រព័ន្ធគណនាShaoguanបានលើសពី៥០%ក្នុងរយៈពេលជាច្រើនខែជាប់ៗគ្នា។
ស្របពេលគម្រោងដែលតំបន់ភាគខាងលិចនាំចូលតម្រូវការខាងប្រព័ន្ធគណនាពីតំបន់ខាងកើតត្រូវបានជំរុញយ៉ាងស៊ីជម្រៅ សួនឧស្សាហកម្មប្រព័ន្ធគណនាជាច្រើនត្រូវបានបង្កើតឡើងយ៉ាងមមាញឹកនៅទូទាំងប្រទេសចិន។ នៅឆ្នាំ២០២៥ ទំហំទីផ្សារត្រង់ស្វូរម៉ាទ័រក្នុងប្រទេសចិនបានកើនឡើងជាង២០%បើប្រៀបធៀបនឹងឆ្នាំ២០២៤ ទន្ទឹមនឹងការបញ្ជាទិញប្រព័ន្ធគណនាបញ្ញាសិប្បនិម្មិតនិងផលិតផលកម្រិតខ្ពស់ដែលទាក់ទងនឹងវ៉ុលខ្ពស់ខ្លាំង(Ultra High Voltage)មានចំនួនជាង៣៥% ដែលបានក្លាយជាក្បាលម៉ាស៊ីនស្នូលនៃកំណើនឧស្សាហកម្ម។
ចង្កោមកុំព្យូទ័រទំនើបAIមានតម្រូវការខ្ពស់សម្រាប់គុណភាពផ្គត់ផ្គង់ថាមពលអគ្គិសនី ហើយឧស្សាហកម្មត្រង់ស្វូរម៉ាទ័ររបស់ប្រទេសចិនក៏កំពុងពឹងផ្អែកលើឧត្តមភាពនៃបច្ចេកវិទ្យាស្នូលរបស់ខ្លួនដើម្បីដណ្តើមយកចំណែកនៃទីផ្សារប្រព័ន្ធគណនាសកលផងដែរ។
លោកMa Yongអនុប្រធានវិទ្យាស្ថានស្រាវជ្រាវបច្ចេកវិទ្យាបញ្ជូននិងចែកចាយអគ្គិសនីនៃបណិ្ឌត្យសភាវិទ្យាសាស្ត្រអគ្គិសនីខេត្តJiangsuបានថ្លែងថា បច្ចេកវិទ្យាត្រង់ស្វូរម៉ាទ័ររបស់ប្រទេសចិនជាប់ចំណាត់ថ្នាក់ឈានមុខគេលើពិភពលោក។ ក្រុមហ៊ុនចិនបន្តជំរុញការច្នៃប្រឌិតថ្មីផ្នែកបច្ចេកវិទ្យា ដើម្បីជំរុញឧស្សាហកម្មនេះឆ្ពោះទៅរកទិសដៅភាពវៃឆ្លាតខ្ពស់ ការខាតបង់កម្រិតទាប និងមានទំហំកាន់តែតូច៕
