ប្រ៊ុចសែល៖ អង្គការណាតូ បានចាប់ផ្តើមផែនការយោធាសម្រាប់បេសកកម្ម “Arctic Sentry” ដើម្បីបង្កើនការប្រុងប្រយ័ត្ន ខណៈដែលភាពតានតឹងនៅតែបន្តកើតមានរវាងសហរដ្ឋអាមេរិក និងសម្ព័ន្ធមិត្តអឺរ៉ុបលើកោះ Greenland។
មន្ត្រីណាតូម្នាក់បានប្រាប់កាសែតស៊ិនហួ ដោយមិនបានផ្តល់ព័ត៌មានលម្អិតបន្ថែមថា “យើងអាចបញ្ជាក់បានថា ផែនការសម្រាប់ Arctic Sentry កំពុងដំណើរការ”។
មន្ត្រីរូបនេះក៏បានបញ្ជាក់ពីរបាយការណ៍មុននេះដោយដកស្រង់សម្តីលោក Martin O’Donnell អ្នកនាំពាក្យរបស់ទីស្នាក់ការកណ្តាលកំពូលរបស់អង្គការណាតូ Allied Powers Europe ដែលបានឧ្យដឹងថា ផែនការបានចាប់ផ្តើមសម្រាប់ “Arctic Sentry” ដែលជាសកម្មភាពមួយដែលនឹងពង្រឹងជំហររបស់អង្គការណាតូ នៅក្នុងតំបន់អាកទិក និងតំបន់ខ្ពស់ភាគខាងជើង។
ចលនានេះកើតឡើងបន្ទាប់ពីការអត្ថាធិប្បាយម្តងហើយម្តងទៀតដោយប្រធានាធិបតីអាមេរិកលោក ដូណាល់ ត្រាំ ថាលោកចង់ទទួលបានកោះ Greenland ដែលជាទឹកដីគ្រប់គ្រងដោយខ្លួនឯងនៅក្នុងព្រះរាជាណាចក្រដាណឺម៉ាក ដែលបង្កឱ្យមានការប្រឆាំងយ៉ាងខ្លាំងនៅទូទាំងអឺរ៉ុប។
លោក Jens-Frederik Nielsen នាយករដ្ឋមន្ត្រីនៃកោះ Greenland បានឧ្យដឹងក្នុងបទសម្ភាសន៍មួយជាមួយសាជីវកម្មផ្សព្វផ្សាយដាណឺម៉ាកថា ទោះបីជាមានការបន្តកិច្ចចរចាការទូតជាមួយរដ្ឋាភិបាលសហរដ្ឋអាមេរិកក៏ដោយ ក៏បំណងប្រាថ្នារបស់ទីក្រុងវ៉ាស៊ីនតោន ក្នុងការគ្រប់គ្រងកោះ Greenland នៅតែមាន៕
ប្រែសម្រួល ឈូក បូរ៉ា
