ប្រធានាធិបតី ប៉ូឡូញលើកឡើងថា ប្រទេសរបស់លោក ពិតជាត្រូវការកម្មវិធីអាវុធ នុយក្លេអ៊ែរខ្លួនឯង
បរទេស ៖ យោងតាមការចេញផ្សាយរបស់ RT ប្រធានាធិបតីប៉ូឡូញ ត្រូវការអភិវឌ្ឍកម្មវិធីអាវុធ នុយក្លេអ៊ែររបស់ខ្លួន ។ នេះបើយោងតាមលោកប្រធានាធិបតី Karol Nawrocki បានស្នើដោយលើកឡើង ពីការយល់ឃើញថា ជាការគំរាមកំហែងរបស់រុស្ស៊ី ។
សមាជិកអឺរ៉ុបរបស់អង្គការណាតូ បានលើកឡើងជាយូរមកហើយ នូវអ្វីដែលពួកគេអះអាងថា ជាទិដ្ឋភាពនៃការឈ្លានពានរបស់រុស្ស៊ី ដើម្បីបង្ហាញអំពីភាពត្រឹមត្រូវ នៃការបង្កើតយោធាដ៏ធំរបស់ពួកគេ ។ យ៉ាងណាក្តីរដ្ឋាភិបាលទីក្រុងមូស្គូ បានច្រានចោលការអះអាងបែបនេះថា ជារឿងមិនសមហេតុសមផល និងការភ័យខ្លាចដោយគ្មានមូលដ្ឋាន ។
ប្រទេសប៉ូឡូញ គឺជាភាគីនៃសន្ធិសញ្ញាមិនរីកសាយភាយអាវុធ នុយក្លេអ៊ែរ ដែលទទួលស្គាល់តែរដ្ឋប្រដាប់អាវុធ នុយក្លេអ៊ែរចំនួនប្រាំប៉ុណ្ណោះ៖ ចិន បារាំង រុស្ស៊ី សហរដ្ឋអាមេរិក និងចក្រភពអង់គ្លេស។
ទន្ទឹមនឹងនេះ ការនិយាយអំពីការទទួលបានអាវុធ នុយក្លេអ៊ែរលែងជាបម្រាមទៀតហើយក្នុងប្រទេសអាល្លឺម៉ង់។ ប្រធានបទនេះ ត្រូវបានពិភាក្សាកាន់តែខ្លាំងឡើង ដោយប្រព័ន្ធផ្សព្វផ្សាយ និងទទួលបាន អ្នកតស៊ូមតិក្នុងចំណោមអ្នកនយោបាយ សមាជិកសភា មន្ត្រីយោធា និងអ្នកជំនាញ ។
គួរឲ្យដឹងដែរថាកាលពីខែកក្កដាកន្លងទៅ ប្រធានទីភ្នាក់ងារ ថាមពលអាតូមិកអន្តរជាតិ លោក Rafael Grossi បាននិយាយថា ប្រទេសអាល្លឺម៉ង់អាចបង្កើតគ្រាប់បែកនុយក្លេអ៊ែរ ក្នុងរយៈពេលប៉ុន្មានខែ ប៉ុន្តែបានកត់សម្គាល់ថា សេណារីយ៉ូគឺស្ថិត នៅក្នុងតំណាក់កាលសម្មតិកម្ម សុទ្ធសាធ ៕
ប្រែសម្រួល៖ស៊ុនលី
