មន្ត្រីជាន់ខ្ពស់អ៊ីរ៉ង់ លើកឡើងថា សន្តិភាពអាចត្រឡប់មកវិញ បានលុះត្រាណា តែអាមេរិកដកខ្លួន ចេញពីតំបន់ឈូងសមុទ្រពែរទាំងអស់
បរទេស ៖ យោងតាមការចេញផ្សាយរបស់ RT ដើម្បីឱ្យជម្លោះ ដែលកំពុងបន្តរវាងអ៊ីរ៉ង់ និងអាមេរិកត្រូវបញ្ចប់ ភាគីចុងក្រោយត្រូវតែ ដកកងកម្លាំងយោធា របស់ខ្លួនចេញពីឈូងសមុទ្រពែរទាំងអស់ជាមុនសិន។
ការលើកឡើងគឺធ្វើឡើងដោយសមាជិកនៃក្រុមប្រឹក្សាប្រឹក្សាម្នាក់ របស់ថ្នាក់ដឹកនាំកំពូលរបស់អ៊ីរ៉ង់។លោក Mohsen Rezaee ឧត្តមសេនីយ៍ចូលនិវត្តន៍ និងជាអតីតមេបញ្ជាការ កងឆ្មាំបដិវត្តន៍ឥស្លាម (IRGC) បានបន្ថែមថា ក្រុងតេហរ៉ង់ក៏នឹងស្វែងរកសំណង ពេញលេញសម្រាប់ការខូចខាតដែលបានធ្វើ និងការធានាសន្តិសុខដែកពីទី ក្រុងវ៉ាស៊ីនតោនផងដែរ។
នៅក្នុងបទសម្ភាសន៍ជាមួយទូរទស្សន៍ SNN TV របស់អ៊ីរ៉ង់ ដែលបានចេញផ្សាយកាលពីថ្ងៃសៅរ៍ សមាជិកក្រុមប្រឹក្សា Expediency Discernment បាននិយាយថា ៖ វត្តមានរបស់សហរដ្ឋអាមេរិក នៅឈូងសមុទ្រពែរ គឺជាមូលហេតុចម្បង នៃអសន្តិសុខ ក្នុងរយៈពេល៥០ ឆ្នាំកន្លងមកនេះ។
លោក Rezaee បានអះអាងទៀតថា៖ការបញ្ចប់សង្គ្រាមក៏ស្ថិតក្នុងដៃ របស់យើងដែរ ដោយកំណត់លក្ខខណ្ឌនៃការដកទ័ពអាមេរិកចេញពីឈូងសមុទ្រពែរក្នុង ចំណោមលក្ខខណ្ឌចាំបាច់សំខាន់ៗ ផ្សេងទៀត។ លោកបានបន្ថែមថា លើសពីនេះ អ៊ីរ៉ង់រំពឹងថានឹងទទួលបានសំណង ពីសហរដ្ឋអាមេរិកដូចគ្នាផងដែរ៕
ប្រែសម្រួល៖ស៊ុនលី
