ប្រទេសគុយបាអះអាងថា បានជួបជាមួយនឹងគណៈ ប្រតិភូតំណាង របស់សហរដ្ឋអាមេរិក កាលពីពេលថ្មីៗនេះ
បរទេស៖ទីភ្នាក់ងារចិនស៊ិនហួចេញ ផ្សាយនៅថ្ងៃនេះបានឲ្យដឹងថា កិច្ចប្រជុំមួយត្រូវបានធ្វើឡើងនាពេលថ្មីៗ នេះនៅក្នុងប្រទេសគុយបារវាងគណៈប្រតិភូមកពីគុយបា និងសហរដ្ឋអាមេរិក ។
ការអះអាងនេះត្រូវបានធ្វើឡើង ដោយលោក Alejandro Garcia del Toro អគ្គនាយករងទទួលបន្ទុកកិច្ចការ សហរដ្ឋអាមេរិកនៅក្រសួងការបរទេសគុយបា បានប្រាប់កាសែតរដ្ឋរបស់គុយបាកាលពីថ្ងៃចន្ទ។
លោក Garcia បានប្រាប់កាសែត របស់បក្សកុម្មុយនិស្តគុយបាថា ៖ភាគីសហរដ្ឋអាមេរិក ត្រូវបានតំណាង ដោយអនុរដ្ឋលេខាធិការនៃក្រសួងការបរទេស ខណៈដែលភាគីគុយបាបានចូលរួម នៅក្នុងកម្រិតនៃអនុរដ្ឋមន្ត្រីក្រសួងការបរទេស។
លោកបានបញ្ជាក់ទៀតថា ការចរចាត្រូវបានចាត់ចែងដោយការប្រើឆន្ទានុសិទ្ធិ ខណៈដែលពួកគេត្រូវបានរដ្ឋាភិបាលគុយបាចាត់ទុកថាជារឿងរសើប។លោកGarcia ក៏បានសង្កត់ធ្ងន់ដែរថា ភាគីទាំងសងខាងមិនបានកំណត់ពេលវេលាកំណត់ ឬធ្វើការទាមទារដោយបង្ខិតបង្ខំណាមួយឡើយ ហើយការផ្លាស់ប្តូរទាំងអស់ធ្វើឡើងដោយគោរព និងប្រកបដោយវិជ្ជាជីវៈ។
លោកបាននិយាយថា ៖ ការដកចេញនូវការរាំងស្ទះថាមពលប្រឆាំងនឹងប្រទេសគឺជាអាទិភាពកំពូល សម្រាប់អ្នកតំណាងគុយបា ដោយសំដៅលើការដាក់ទណ្ឌកម្ម ដែលប្រកាសដោយទីក្រុងវ៉ាស៊ីនតោនប្រឆាំងនឹង ប្រទេសដែលលក់ប្រេងឥន្ធនៈឱ្យគុយបាជាដើម៕
ប្រែសម្រួល៖ស៊ុនលី
