សក្ខីកម្មរបស់លោក ណេតាន់យ៉ាហ៊ូ ក្នុងសវនាការអំពើពុករលួយ ត្រូវបានបន្តឡើងវិញ បន្ទាប់ពីផ្អាកដោយសារ សង្គ្រាមជាមួយអ៊ីរ៉ង់
យេរូសាឡឹម៖ នាយករដ្ឋមន្ត្រី អ៊ីស្រាអែល លោក បេនចាមីន ណេតាន់យ៉ាហ៊ូ បានបន្តសក្ខីកម្មរបស់លោក នៅក្នុងសវនាការព្រហ្មទណ្ឌនៅ តុលាការទីក្រុងនTel Aviv កាលពីថ្ងៃអង្គារ បន្ទាប់ពីការផ្អាករយៈពេលពីរ ខែដោយសារសង្គ្រាមជាមួយអ៊ីរ៉ង់។
លោក ណេាន់យ៉ាហ៊ូ ដែលប្រឈមមុខនឹងការចោទប្រកាន់ក្នុងករណីអំពើពុករលួយចំនួនបី គឺត្រូវបន្តសក្ខីកម្មនៅថ្ងៃចន្ទ ដែលត្រូវបានលុបចោលបន្ទាប់ពីមេធាវីរបស់លោកបានស្នើសុំការពន្យារពេល ដោយលើកឡើងពី “ការរឹតបន្តឹងកាលវិភាគទាក់ទងនឹងសន្តិសុខ”។
ក្នុងអំឡុងពេលសក្ខីកម្មនៅថ្ងៃអង្គារ ព្រះរាជអាជ្ញា Yehudit Tirosh បានបន្តការសួរចម្លើយនៅក្នុងសំណុំរឿង ដែលហៅថា Case 4000 ដែលក្នុងនោះលោក ណេតាន់យ៉ាហ៊ូ ត្រូវបានចោទប្រកាន់ពីបទជំរុញ បទប្បញ្ញត្តិដែលផ្តល់អត្ថប្រយោជន៍ដល់លោក Shaul Elovitch ដែលជាម្ចាស់ភាគហ៊ុនគ្រប់គ្រងនៃក្រុមហ៊ុន Bezeq ដែលជាក្រុមហ៊ុនទូរគមនាគមន៍ធំជាងគេរបស់អ៊ីស្រាអែល និងគេហទំព័រព័ត៌មាន Walla ជាថ្នូរនឹងការផ្សាយព័ត៌មានអំណោយផលដល់រូបលោក។
លោក ណេតាន់យ៉ាហ៊ូ ត្រូវបានចោទប្រកាន់ពីបទសូកប៉ាន់ ការក្លែងបន្លំ និងការរំលោភលើទំនុកចិត្ត ប៉ុន្ដែលោកបដិសេធរាល់ការចោទប្រកាន់ទាំងអស់។
យោងតាមកាសែត Haaretz របស់អ៊ីស្រាអែល ការបង្ហាញខ្លួនពីមុនរបស់លោក ណេតាន់យ៉ាហ៊ូ នៅថ្ងៃទី២៤ ខែកុម្ភៈ គឺជាលើកទី៨០ ដែលលោកបានផ្តល់សក្ខីកម្មនៅក្នុងសវនាការ។
ភាពអាសន្នត្រូវបានប្រកាសទូទាំងប្រទេសនៅចុងខែកុម្ភៈ បន្ទាប់ពីអ៊ីស្រាអែល និងសហរដ្ឋអាមេរិក បានចាប់ផ្តើមសង្គ្រាមលើអ៊ីរ៉ង់ ដោយបង្ខំឱ្យបិទស្ថាប័ន អាជីវកម្ម និងសាលារៀនជាច្រើន។ តុលាការក៏បានដំណើរការក្នុង «របៀបសង្គ្រោះបន្ទាន់» ដោយមានតែការសវនាការបន្ទាន់ប៉ុណ្ណោះដែលធ្វើឡើងតាមរយៈវីដេអូ៕
ប្រែសម្រួល ឈូក បូរ៉ា
