ប្រធានាធិបតី ត្រាំថា លោកកំពុងពិនិត្យឡើងវិញ នូវសំណើថ្មីរបស់អ៊ីរ៉ង់ ដើម្បីបញ្ចប់សង្គ្រាម
បរទេស៖ ប្រធានាធិបតីអាមេរិកលោក ដូណាល់ ត្រាំ បាននិយាយកាលពីថ្ងៃសៅរ៍ថា លោកកំពុងពិនិត្យមើលសំណើថ្មីមួយរបស់អ៊ីរ៉ង់ ដើម្បីបញ្ចប់សង្គ្រាម។
យោងតាមសារព័ត៌មាន AP ចេញផ្សាយនៅថ្ងៃទី៣ ខែឩសភា ឆ្នាំ២០២៦ថា លោកបានមានប្រសាសន៍មុនពេលឡើងយន្តហោះ Air Force One ថា “ខ្ញុំនឹងជម្រាបជូនអ្នកអំពីវានៅពេលក្រោយ” ដោយបន្ថែមថា “ពួកគេនឹងផ្តល់ពាក្យពេចន៍ពិតប្រាកដដល់ខ្ញុំឥឡូវនេះ”។
សារព័ត៌មានអ៊ីរ៉ង់ពាក់កណ្តាលផ្លូវការពីរគឺ Tasnim និង Fars ដែលគេជឿថា ស្និទ្ធនឹងកងឆ្មាំបដិវត្តន៍ប៉ារ៉ាយោធារបស់អ៊ីរ៉ង់ បានផ្សាយថា អ៊ីរ៉ង់បានផ្ញើសំណើ ១៤ ចំណុច តាមរយៈប៉ាគីស្ថាន ដើម្បីឆ្លើយតបទៅនឹងសំណើប្រាំបួនចំណុចរបស់សហរដ្ឋអាមេរិក។ ប៉ាគីស្ថានធ្លាប់បានរៀបចំការចរចា ពីមុនរវាងអ៊ីរ៉ង់ និងសហរដ្ឋអាមេរិក។
មួយសន្ទុះបន្ទាប់ពីនិយាយ ទៅកាន់អ្នកយកព័ត៌មាន លោក ត្រាំ ហាក់ដូចជាមានការសង្ស័យ អំពីផែនការរបស់អ៊ីរ៉ង់ នៅក្នុងការបង្ហោះមួយ នៅលើប្រព័ន្ធផ្សព្វផ្សាយសង្គម ។ លោកបានសរសេរថា លោក “មិនអាចស្រមៃថា វាអាចទទួលយកបានទេ ដោយសារពួកគេមិនទាន់ បានបង់ថ្លៃគ្រប់គ្រាន់សម្រាប់អ្វី ដែលពួកគេបានធ្វើ ចំពោះមនុស្សជាតិ និងពិភពលោកក្នុងរយៈពេល ៤៧ ឆ្នាំចុងក្រោយនេះ”។
ប្រែសម្រួល: ណៃ តុលា
