សហរដ្ឋអាមេរិក ចាប់ផ្តើមណែនាំកប៉ាល់ ចេញពីច្រកសមុទ្រហ័រមូស
វ៉ាស៊ីនតោន៖ ប្រធានាធិបតី សហរដ្ឋអាមេរិក លោក ដូណាល់ ត្រាំ បានឧ្យដឹងថា សហរដ្ឋអាមេរិក នឹងចាប់ផ្តើមណែនាំកប៉ាល់ ចេញពីច្រកសមុទ្រហ័រមូស នៅព្រឹកថ្ងៃច័ន្ទនេះ ម៉ោងនៅមជ្ឈិមបូព៌ា។ ដោយហៅសកម្មភាពនេះថា “គម្រោងសេរីភាព” លោក ត្រាំ បានឧ្យដឹងថា វាគឺជា “កាយវិការមនុស្សធម៌”។
លោក ត្រាំ បានឧ្យដឹងនៅលើបណ្ដាញ Truth Social របស់លោកថា ប្រទេសមកពីជុំវិញពិភពលោក ដែលស្ទើរតែទាំងអស់មិនពាក់ព័ន្ធនឹងជម្លោះមជ្ឈិមបូព៌ា ដែលកំពុងកើតឡើងយ៉ាងច្បាស់លាស់ និងហិង្សា សម្រាប់មនុស្សគ្រប់គ្នាបានឃើញ បានស្នើសុំសហរដ្ឋអាមេរិកថា តើយើងអាចជួយដោះលែងកប៉ាល់របស់ពួកគេ ដែលត្រូវបានចាក់សោរនៅក្នុងច្រកសមុទ្រហ័រមូស លើអ្វីមួយដែលពួកគេមិនមានអ្វីពាក់ព័ន្ធទាល់តែសោះ ពួកគេគ្រាន់តែជាអ្នកឈរមើលអព្យាក្រឹត និងគ្មានកំហុស!”។
លោកបានលេីកឡេីងថា «ដើម្បីប្រយោជន៍របស់អ៊ីរ៉ង់ មជ្ឈិមបូព៌ា និងសហរដ្ឋអាមេរិក យើងបានប្រាប់ប្រទេសទាំងនេះថា យើងនឹងដឹកនាំកប៉ាល់របស់ពួកគេចេញពីផ្លូវទឹកដែលមានការរឹតត្បិតទាំងនេះដោយសុវត្ថិភាព ដើម្បីឲ្យពួកគេអាចបន្តអាជីវកម្មរបស់ពួកគេបានដោយសេរី និងប្រកបដោយសមត្ថភាព»។
លោកបានបន្ថែមថា កប៉ាល់ជាច្រើនក្នុងចំណោមកប៉ាល់ទាំងនេះកំពុងខ្វះខាតស្បៀងអាហារ និងអ្វីៗផ្សេងទៀតដែលចាំបាច់សម្រាប់ក្រុមនាវិកទ្រង់ទ្រាយធំដើម្បីនៅលើកប៉ាល់ដោយមានសុខភាពល្អ និងមានអនាម័យ។
លោកបានព្រមានថា ប្រសិនបើដំណើរការមនុស្សធម៌នេះត្រូវបានជ្រៀតជ្រែក ជាអកុសល ការជ្រៀតជ្រែកនោះនឹងត្រូវដោះស្រាយដោយកម្លាំង។
ការប្រកាសរបស់លោក បានកើតឡើងនៅពេលដែលអ៊ីរ៉ង់ បានឧ្យដឹងថា ខ្លួនបានទទួល និងកំពុងពិនិត្យមើលការឆ្លើយតបរបស់សហរដ្ឋអាមេរិកចំពោះសំណើសន្តិភាព ១៤ចំណុចរបស់ខ្លួន ទោះបីជាលោក ត្រាំ បានឧ្យដឹងកាលពីថ្ងៃសៅរ៍ថា លោកមិនអាចស្រមៃថាវាជាផែនការ នឹងអាចទទួលយកបាននោះទេ៕
ប្រែសម្រួល ឈូក បូរ៉ា
