អ៊ីរ៉ង់ ដាក់ពាក្យប្តឹងសហរដ្ឋអាមេរិក តុលាការអាជ្ញាកណ្តាល អចិន្ត្រៃយ៍ ពីបទវាយប្រហារ រោងចក្រ នុយក្លេអ៊ែរ និងការដាក់ទណ្ឌកម្ម
តេអេរ៉ង់៖ រដ្ឋាភិបាលអ៊ីរ៉ង់ បានដាក់ពាក្យបណ្តឹងប្រឆាំងនឹងសហរដ្ឋអាមេរិកនៅតុលាការអាជ្ញាកណ្តាលអចិន្ត្រៃយ៍ (PCA) ក្នុងទីក្រុងឡាអេ ពីបទឈ្លានពានយោធា របស់ទីក្រុងវ៉ាស៊ីនតោន ប្រឆាំងនឹងរោងចក្រនុយក្លេអ៊ែរអ៊ីរ៉ង់ ការដាក់ទណ្ឌកម្មសេដ្ឋកិច្ច និងការគំរាមកំហែង នៃសកម្មភាពយោធា ប្រឆាំងនឹងប្រទេសនេះ។
យោងតាមទីភ្នាក់ងារសារព័ត៌មាន Mizan នៃតុលាការអ៊ីរ៉ង់ បណ្តឹងនេះត្រូវបានដាក់ទៅ PCA ក្នុងខែកុម្ភៈ ដោយលើកឡើងពីការរំលោភ លើកិច្ចព្រមព្រៀងអាល់ហ្សេរីឆ្នាំ១៩៨១ និងការរំលោភលើការប្តេជ្ញាចិត្ត អន្តរជាតិរបស់សហរដ្ឋអាមេរិក ក្នុងអំឡុងពេលសង្គ្រាមរយៈពេល១២ថ្ងៃប្រឆាំងនឹងអ៊ីរ៉ង់ ក្នុងខែមិថុនា ឆ្នាំ២០២៥។
យោងតាមសារព័ត៌មាន Mizan អ៊ីរ៉ង់បានទាមទារឱ្យតុលាការកាត់ទោស សហរដ្ឋអាមេរិកពីបទ ជ្រៀតជ្រែកក្នុងកិច្ចការផ្ទៃក្នុងរបស់ខ្លួន និងបញ្ជាឱ្យរដ្ឋាភិបាលអាមេរិក បញ្ចប់ការជ្រៀតជ្រែកដោយផ្ទាល់ និងដោយប្រយោលរបស់ខ្លួនជាបន្ទាន់។
របាយការណ៍នេះបានឲ្យដឹងថា អ៊ីរ៉ង់ ក៏បានទាមទារឲ្យសហរដ្ឋអាមេរិកផ្តល់ការធានាថា ខ្លួននឹងមិនធ្វើសកម្មភាពទាំងនោះម្តងទៀតឡើយ និងសងសំណងពេញលេញសម្រាប់ការខូចខាតដែលបានបង្កឡើងលើអ៊ីរ៉ង់។
អ៊ីរ៉ង់បានចុះហត្ថលេខាលើផែនការសកម្មភាពរួមដ៏ទូលំទូលាយ (JCPOA) ក្នុងខែកក្កដា ឆ្នាំ២០១៥ ដែលបានដាក់ការរឹតត្បិតលើកម្មវិធីនុយក្លេអ៊ែររបស់ខ្លួនជា ថ្នូរនឹងការបន្ធូរបន្ថយទណ្ឌកម្ម៕
ប្រែសម្រួល ឈូក បូរ៉ា
