លោក ដូណាល់ ត្រាំ ថា ចិននឹងបញ្ជាទិញយន្តហោះ Boeing ចំនួន ២០០គ្រឿង
បរទេស: ប្រធានាធិបតីអាមេរិក លោក ដូណាល់ ត្រាំ បាននិយាយថា ប្រទេសចិនបានយល់ព្រមបញ្ជាទិញយន្តហោះ Boeing ចំនួន ២០០គ្រឿង ដែលជាកិច្ចព្រមព្រៀងមួយ ដែលនឹងសម្គាល់ការទិញយន្តហោះពាណិជ្ជកម្ម ដែលផលិតនៅសហរដ្ឋអាមេរិក ជាលើកដំបូង របស់ប្រទេសចិន ក្នុងរយៈពេលជិតមួយទសវត្សរ៍ ប៉ុន្តែវានៅតែទាបជាងការប៉ាន់ស្មាន មុនកិច្ចប្រជុំកំពូលដ៏សំខាន់ ជាមួយប្រធានាធិបតីចិន ស៊ី ជីនពីង។
យោងតាមសារព័ត៌មាន AiroTimes ចេញផ្សាយនៅថ្ងៃទី១៥ ខែឩសភា ឆ្នាំ២០២៦ថា លោក ត្រាំ បានប្រកាសពីកិច្ចព្រមព្រៀងនេះនៅថ្ងៃទី១៤ ខែឧសភា ឆ្នាំ ២០២៦ បន្ទាប់ពីបានជួបជាមួយប្រធានាធិបតី ស៊ី នៅទីក្រុងប៉េកាំង។ លោកមិនបាននិយាយថាប្រភេទយន្តហោះណាខ្លះត្រូវបានរួមបញ្ចូល ក្រុមហ៊ុនអាកាសចរណ៍ចិនណាដែលនឹងទទួលបាន ឬពេលណាការដឹកជញ្ជូននឹងចាប់ផ្តើមនោះទេ។
លោក ត្រាំ បាននិយាយនៅក្នុងបទសម្ភាសន៍ជាមួយ Fox News ដោយសំដៅទៅលើលោក ស៊ី ថា “រឿងមួយដែលលោកបានយល់ព្រមនៅថ្ងៃនេះ គឺលោកនឹងបញ្ជាទិញយន្តហោះចំនួន ២០០ គ្រឿង”។ “ក្រុមហ៊ុន Boeing ចង់បាន ១៥០ គ្រឿង ពួកគេទទួលបាន ២០០ គ្រឿង”។
របាយការណ៍មុនៗបានបង្ហាញថា ប្រទេសចិនអាចបញ្ជាទិញយន្តហោះ Boeing 737 MAX រហូតដល់ ៥០០ គ្រឿង រួមជាមួយនឹងយន្តហោះធំទូលាយប្រហែល ១០០ គ្រឿង រួមទាំងយន្តហោះ 787 Dreamliners និងយន្តហោះ 777X។
ប្រែសម្រួល: ណៃ តុលា
