លោក ដូណាល់ ត្រាំ បញ្ជាក់ថា ការចរចាជាមួយអ៊ីរ៉ង់ ស្ថិតក្នុងដំណាក់កាលចុងក្រោយ ខណៈអាមេរិក កំពុងរង់ចាំចម្លើយត្រឹមត្រូវ
វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានឧ្យដឹងថា រដ្ឋបាលរបស់លោកស្ថិត ក្នុងដំណាក់កាលចុងក្រោយ នៃកិច្ចចរចាសន្តិភាពជាមួយអ៊ីរ៉ង់ ហើយមានឆន្ទៈរង់ចាំរយៈពេលពីរ ឬបីថ្ងៃសម្រាប់ចម្លើយត្រឹមត្រូវមួយ។
លោក ត្រាំ បានប្រាប់អ្នកយកព័ត៌មានថា «យើងកំពុងស្ថិតក្នុងដំណាក់កាលចុងក្រោយ នៃកិច្ចចរចាជាមួយអ៊ីរ៉ង់ យើងនឹងឃើញអ្វីដែលនឹងកើតឡើង»។
លោកបានបន្ថែមថា «យើងនឹងមានកិច្ចព្រមព្រៀង ឬយើងនឹងធ្វើរឿងមួយចំនួន ដែលអាក្រក់បន្តិច ប៉ុន្តែសង្ឃឹមថារឿងនោះនឹងមិនកើតឡើងនោះទេ»។
ប្រធានាធិបតីអាមេរិករូបនេះបានអះអាងថា លោក «មិនប្រញាប់ប្រញាល់» ដើម្បីបញ្ចប់កិច្ចព្រមព្រៀងសន្តិភាពជាមួយអ៊ីរ៉ង់នោះទេ ដោយបានបង្ហាញថា លោកនឹងមិនពិចារណាធ្វើ «កិច្ចព្រមព្រៀងមានកំណត់» ដែលផ្តោតតែលើការបើកច្រកសមុទ្រហ័រមូសឡើងវិញនោះទេ។
លោកបាននិយាយអំពីកិច្ចព្រមព្រៀងដែលអាចកើតមានមួយថា «យើងនឹងផ្តល់ឱកាសមួយ» ដោយច្រានចោលគំនិតនៃការសម្របសម្រួលដោយផ្នែក។
«ខ្ញុំមិនប្រញាប់ទេ។ អ្នកមិនដែលគិតថា ការបោះឆ្នោតពាក់កណ្តាលអាណត្តិ ខ្ញុំប្រញាប់ណាស់ នោះទេ។ ខ្ញុំមិនប្រញាប់ទេ»។
លោកប្រធានាធិបតីបានបន្ថែមថា លោកបានសន្ទនាតាមទូរស័ព្ទ «ល្អណាស់» ជាមួយប្រធានាធិបតីតួកគីលោក Recep Tayyip Erdogan កាលពីព្រឹកថ្ងៃពុធ ។ តួកគី ត្រូវបានគេមើលឃើញថាជាអ្នកសម្របសម្រួលដ៏សំខាន់មួយ ក្នុងអំឡុងពេលចរចារវាងសហរដ្ឋអាមេរិក និងអ៊ីរ៉ង់។
កងឆ្មាំបដិវត្តន៍អ៊ីស្លាមអ៊ីរ៉ង់ កាលពីថ្ងៃពុធបានព្រមានថា ប្រសិនបើការឈ្លានពានរបស់សហរដ្ឋអាមេរិក និងអ៊ីស្រាអែល ប្រឆាំងនឹងប្រទេសនេះត្រូវបានធ្វើឡើងម្តងទៀត សង្គ្រាមនឹងពង្រីកហួសពីតំបន់អាស៊ីខាងលិច៕
ប្រែសម្រួល ឈូក បូរ៉ា
