អាល្លឺម៉ង់ នឹងដាក់ពង្រាយប្រព័ន្ធ Patriot ទៅកាន់តួកគី ក្រោមបេសកកម្ម របស់អង្គការណាតូ ចំពេលមានភាពតានតឹងក្នុងតំបន់
ប៊ែរឡាំង៖ ក្រសួងការពារជាតិតួកគី បានឧ្យដឹងថា ប្រទេសអាល្លឺម៉ង់ នឹងដាក់ពង្រាយប្រព័ន្ធការពារដែនអាកាស Patriot ទៅកាន់ប្រទេសតួកគី នៅក្នុងខែមិថុនា សម្រាប់បេសកកម្មរយៈពេល ៦ខែ ក្រោមវិធានការរបស់អង្គការណាតូ ដែលមានគោលបំណងពង្រឹង ការការពារដែនអាកាសរបស់ប្រទេសនេះ ចំពេលមានភាពតានតឹងក្នុងតំបន់ដែល ពាក់ព័ន្ធនឹងសហរដ្ឋអាមេរិក អ៊ីស្រាអែល និងអ៊ីរ៉ង់។
អ្នកនាំពាក្យក្រសួងការពារជាតិលោក Zeki Akturk បានឧ្យដឹងថា ប្រព័ន្ធអាល្លឺម៉ង់នឹងជំនួសប្រព័ន្ធ Patriot បន្ថែមមួយក្នុងចំណោមប្រព័ន្ធ Patriot បន្ថែមដែលដាក់ពង្រាយនៅក្នុងប្រទេសតួកគី ដោយអង្គការណាតូ។ វានឹងដំណើរការរួមគ្នាជាមួយប្រព័ន្ធ Patriot របស់អេស្ប៉ាញ ដែលឈរជើងរួចហើយនៅក្នុងប្រទេសនេះ។
ថ្លែងនៅក្នុងសន្និសីទសារព័ត៌មាន នៅមូលដ្ឋានយោធាមួយក្នុងទីក្រុង Izmir ភាគនិរតីប្រទេស លោក Akturk បានឧ្យដឹងថា ការដាក់ពង្រាយនេះកំពុងត្រូវបាន សម្របសម្រួលជាមួយសម្ព័ន្ធមិត្តណាតូ ស្របតាមការវាយតម្លៃសន្តិសុខបច្ចុប្បន្ន។
កាលពីខែមីនា ទីក្រុងអង់ការ៉ា បានឧ្យដឹងថា ប្រព័ន្ធ Patriot របស់សហរដ្ឋអាមេរិកត្រូវបានដាក់ពង្រាយនៅជិត មូលដ្ឋានរ៉ាដារបស់អង្គការណាតូ នៅភាគអាគ្នេយ៍នៃប្រទេសតួកគី បន្ទាប់ពីការគំរាមកំហែងមីស៊ីល ដែលទាក់ទងនឹងជម្លោះជាមួយអ៊ីរ៉ង់។ ក្រោយមក ការការពារដែនអាកាសរបស់អង្គការណាតូ បានស្ទាក់ចាប់មីស៊ីលផ្លោងចំនួន ៤គ្រាប់ដែលបាញ់ចេញពីអ៊ីរ៉ង់ ក្នុងអំឡុងពេលប្រយុទ្ធ នេះបើយោងតាមមន្ត្រីតួកគី។
គួរបញ្ជាក់ថា នៅថ្ងៃទី២៨ ខែកុម្ភៈ សហរដ្ឋអាមេរិក និងអ៊ីស្រាអែល បានបើកការវាយប្រហាររួមគ្នាលើទីក្រុងតេអេរ៉ង់ និងទីក្រុងអ៊ីរ៉ង់ផ្សេងទៀត។ អ៊ីរ៉ង់ បានឆ្លើយតបដោយការវាយប្រហារដោយមីស៊ីល និងយន្តហោះគ្មានមនុស្សបើក ដែលផ្តោតលើមូលដ្ឋានទ័ព និងទ្រព្យសម្បត្តិរបស់អ៊ីស្រាអែល និងសហរដ្ឋអាមេរិក នៅមជ្ឈិមបូព៌ា៕
