ចិន កាត់បន្ថយការនាំចូលប្រេង ចំណែក ការនាំចេញប្រេង របស់សហរដ្ឋអាមេរិកកាន់តែខ្ពស់
បរទេស៖ ដោយសារតម្លៃប្រេងឆៅរូបវន្តបានឡើងដល់កម្រិតខ្ពស់បំផុតគ្រប់ពេលលើសពី ១៦០ ដុល្លារក្នុងមួយបារ៉ែលកាលពីខែមុន អ្នកវិភាគ និងអ្នកជួញដូរបានប្រញាប់ប្រញាល់ព្យាករណ៍ពីការដួលរំលំសេដ្ឋកិច្ច ប្រសិនបើសង្គ្រាមអាមេរិក-អ៊ីរ៉ង់អូសបន្លាយ ហើយច្រកសមុទ្រហ័រមូសនៅតែបិទ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២២ ខែឧសភា ឆ្នាំ២០២៦ថា ប្រាំសប្តាហ៍ក្រោយមក ដោយសារច្រកសមុទ្រហ័រមូស នៅតែបិទភាគច្រើន និងការចរចាសន្តិភាពស្ថិតក្នុងភាពជាប់គាំង តម្លៃមិនបានកើនឡើងទេ ប៉ុន្តែផ្ទុយទៅវិញ បានធ្លាក់ចុះមកត្រឹម ១០០ ទៅ ១១០ ដុល្លារក្នុងមួយបារ៉ែល។
ការធ្លាក់ចុះនេះត្រូវបានជំរុញដោយកត្តាជាច្រើន ដូចជា រោងចក្រចម្រាញ់ប្រេងរបស់ចិនបានកាត់បន្ថយដំណើរការចម្រាញ់ប្រេង និងកាត់បន្ថយការនាំចូល ហើយជំនួសមកវិញ បានប្រើប្រាស់ប្រេងឆៅពីធុងស្តុករបស់ពួកគេ, អ្នកផលិត រោងចក្រចម្រាញ់ប្រេង និងពាណិជ្ជករបាននាំចេញប្រេង និងឥន្ធនៈកាន់តែច្រើន ពីសហរដ្ឋអាមេរិកទៅកាន់ទីផ្សារពិភពលោក ដើម្បីជួយបំពេញចន្លោះប្រហោងនៃការផ្គត់ផ្គង់ពីមជ្ឈិមបូព៌ា។
ប្រហែល ២០% នៃការផ្គត់ផ្គង់ថាមពលសកលបានឆ្លងកាត់ច្រកសមុទ្រហ័រមូសមុនសង្គ្រាម ហើយជម្លោះនេះបានដកប្រេងចំនួន ១៤ លានបារ៉ែលក្នុងមួយថ្ងៃ ឬ ១៤% នៃការផ្គត់ផ្គង់សកល ពីទីផ្សារពីអ្នកផ្គត់ផ្គង់ដូចជាអារ៉ាប៊ីសាអូឌីត អ៊ីរ៉ាក់ អារ៉ាប់រួម និងគុយវ៉ែត។ សង្គ្រាមបានបង្កឲ្យមានអតិផរណា ធ្វើឲ្យសេដ្ឋកិច្ចពិភពលោកថយល្បឿន និងបង្កឲ្យមានការបំផ្លាញតម្រូវការ នៅពេលដែលតម្លៃប្រេងខ្ពស់បង្ខំឲ្យអ្នកប្រើប្រាស់កាត់បន្ថយការទិញ ៕
ប្រែសម្រួលៈ ណៃ តុលា
