អ៊ីរ៉ង់ បិទដែនអាកាសជុំវិញ អាកាសយានដ្ឋានអន្តរជាតិ Imam Khomeini ក្នុងទីក្រុងតេអេរ៉ង់ បន្ទាប់ពីការវាយប្រហាររបស់អ៊ីស្រាអែល
តេអេរ៉ង់៖ ប្រទេសអ៊ីរ៉ង់ បិទដែនអាកាសជុំវិញអាកាសយានដ្ឋានអន្តរជាតិ Imam Khomeini ក្នុងទីក្រុងតេអេរ៉ង់ បន្ទាប់ពីការវាយប្រហាររបស់អ៊ីស្រាអែល។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ពីការផ្ទុះនៅក្នុងទីក្រុងជាច្រើននៅទូទាំងប្រទេស រួមទាំងទីក្រុងតេអេរ៉ង់ ទីក្រុងតាប្រ៊ីស ទីក្រុងអ៊ីស្ហ្វាហាន និងទីក្រុងការ៉ាជ។
កងកម្លាំងការពារជាតិអ៊ីស្រាអែល បានឲ្យដឹងនៅលើ Telegram ថាកងទ័ពអាកាសអ៊ីស្រាអែល បានវាយប្រហារគោលដៅយោធានៅភាគខាងលិច និងកណ្តាលប្រទេសអ៊ីរ៉ង់ ។ ទន្ទឹមនឹងនេះ កាសែត Al Jazeera បានរាយការណ៍ថា អ៊ីស្រាអែល បានវាយប្រហារតំបន់ជាយ ក្រុងភាគខាងត្បូង នៃទីក្រុងបេរូត ដោយមានការផ្ទុះជាច្រើនដង។
អ៊ីស្រាអែលបានឲ្យដឹងថា ខ្លួនបានវាយប្រហារគោលដៅយោធានៅភាគខាងលិច និងកណ្តាលអ៊ីរ៉ង់នៅថ្ងៃចន្ទ ទោះបីជាប្រធានាធិបតីអាមេរិក ដូណាល់ ត្រាំ ដែលត្រូវបានគេរាយការណ៍ថា បានប្រាប់នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ ឲ្យចៀសវាងការវាយប្រហារបន្ថែមទៀត លើអ៊ីរ៉ង់ក៏ដោយ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៨ ខែមិថុនា ឆ្នាំ២០២៦ថា ប៉ុន្មានម៉ោងមុននេះ លោក ត្រាំ បាននិយាយថា ការវាយប្រហារថ្មីដោយអ៊ីស្រាអែល និងអ៊ីរ៉ង់ នឹងមិនប៉ះពាល់ដល់កិច្ចចរចាសន្តិភាពរបស់រដ្ឋបាលលោកជាមួយទីក្រុងតេហេរ៉ង់ទេ ដោយបន្ថែមថា នាយករដ្ឋមន្ត្រីអ៊ីស្រាអែល ប៊ែនចាមីន ណេតាន់យ៉ាហ៊ូ «មិនមែនជាអ្នកបញ្ជា»។
លោក ត្រាំ បានពឹងផ្អែកលើអ៊ីស្រាអែលឱ្យបញ្ឈប់ការវាយប្រហាររបស់ខ្លួននៅក្នុងប្រទេសលីបង់ ដើម្បីអនុញ្ញាតឱ្យមានកិច្ចព្រមព្រៀងមួយ ដើម្បីបញ្ចប់សង្គ្រាមកាន់ តែទូលំទូលាយជាមួយអ៊ីរ៉ង់ រួមទាំងការស្តីបន្ទោសលោក ណេតាន់យ៉ាហ៊ូ ដោយប្រើពាក្យអសុរោះ នៅក្នុងការសន្ទនាតាមទូរស័ព្ទកាលពីសប្តាហ៍មុន។
ទោះជាយ៉ាងណាក៏ដោយ មុននេះនៅថ្ងៃអាទិត្យ អ៊ីស្រាអែលបានបើកការវាយប្រហារ នៅតំបន់បេរូតជាលើកដំបូង ចាប់តាំងពីសហរដ្ឋអាមេរិក បានប្រកាសពីផែនការឈប់បាញ់សម្រាប់ប្រទេសលីបង់កាលពីសប្តាហ៍មុន។ អ៊ីរ៉ង់បានបាញ់មីស៊ីលជាច្រើនគ្រាប់ទៅលើគោលដៅអ៊ីស្រាអែល ជាការសងសឹក ដែលធ្វើឱ្យកិច្ចចរចាសន្តិភាពរវាងសហរដ្ឋអាមេរិក និងអ៊ីរ៉ង់ស្ថិតក្នុងហានិភ័យ។ ប៉ុន្តែលោក ត្រាំ បានទទូចថា កិច្ចព្រមព្រៀងមួយ ដើម្បីបញ្ចប់សង្គ្រាមកាន់តែទូលំទូលាយ នៅតែស្ថិតក្នុងដៃ។
ប្រែសម្រួល ឈូក បូរ៉ា
