តម្លៃប្រេងឥន្ធនៈ របស់ក្រុមហ៊ុនអាកាសចរណ៍អាមេរិក កើនឡើង ៧៨ ភាគរយ ចំពេលមានជម្លោះនៅមជ្ឈិមបូព៌ា
ញូវយ៉ក៖ ក្រុមហ៊ុនអាកាសចរណ៍អាមេរិកបានចំណាយប្រាក់ជិត ៦.៥ ពាន់លានដុល្លារអាមេរិកលើថ្លៃប្រេងឥន្ធនៈក្នុងខែមេសា កើនឡើងជាង ២៦ ភាគរយក្នុងមួយខែ និង ៧៨ ភាគរយ ក្នុងមួយឆ្នាំ ខណៈដែលជម្លោះនៅមជ្ឈិមបូព៌ាបានកន្លងផុតទៅ ១០០ ថ្ងៃ នេះបើយោងតាមការិយាល័យ ស្ថិតិដឹកជញ្ជូនសហរដ្ឋអាមេរិក (BTS) ។
របាយការណ៍ចុងក្រោយរបស់ BTS បានបង្ហាញថា តម្លៃប្រេងឥន្ធនៈយន្តហោះក្នុងមួយហ្គាឡុង ក្នុងខែមេសាគឺ ៤.១១ ដុល្លារ កើនឡើង ៩៤ សេនពីខែមីនា និង ១.៨១ ដុល្លារពីមួយឆ្នាំមុន ។ របាយការណ៍មួយ ដែលចេញផ្សាយដោយសមាគមដឹកជញ្ជូន ផ្លូវអាកាសអន្តរជាតិ (IATA) កាលពីថ្ងៃអាទិត្យបានកត់សម្គាល់ថា ក្រុមហ៊ុននេះរំពឹងថា ក្រុមហ៊ុនអាកាសចរណ៍នឹងសម្រេច បានប្រាក់ចំណេញសុទ្ធសរុបចំនួន ២៣ ពាន់លានដុល្លារនៅឆ្នាំនេះ ដែលទាបជាងការព្យាករណ៍ពីមុនរបស់ខ្លួនចំនួន ១៨ ពាន់លានដុល្លារ។
សមាគមអាកាសចរណ៍អន្តរជាតិ (IATA) ដែលតំណាងឱ្យក្រុមហ៊ុនអាកាសចរណ៍ជាង ៣៧០ នៅសហរដ្ឋអាមេរិក និងជុំវិញពិភពលោក រំពឹងថាប្រាក់ចំណេញសុទ្ធក្នុងមួយអ្នកដំណើរនឹងថយចុះពី ៩,១០ ដុល្លារនៅឆ្នាំ ២០២៥ មកត្រឹម ៤,៥០ ដុល្លារនៅឆ្នាំនេះ។
លោក Willie Walsh អគ្គនាយក IATA បានមានប្រសាសន៍នៅក្នុងរបាយការណ៍នេះថា ជម្លោះនៅអ៊ីរ៉ង់ និងការកើនឡើងនៃថ្លៃប្រេងឥន្ធនៈ «បានផ្លាស់ប្តូរទស្សនវិស័យ សម្រាប់ក្រុមហ៊ុនអាកាសចរណ៍ទៅជារឿងអាក្រក់»។ ដោយសារតែថ្លៃប្រេងឥន្ធនៈខ្ពស់ ក្រុមហ៊ុនអាកាសចរណ៍ Spirit Airlines ដែលជាក្រុមហ៊ុនអាមេរិកមួយ ដែលដំណើរការជាក្រុមហ៊ុនអាកាសចរណ៍ដែលមានតម្លៃទាបបំផុត បានបញ្ឈប់ប្រតិបត្តិការនៅដើមខែឧសភា បន្ទាប់ពីបានដាក់ពាក្យសុំក្ស័យធនពីរដងក្នុងរយៈពេលពីរឆ្នាំមុន៕
ប្រែសម្រួល ឈូក បូរ៉ា
