អាមេរិក លុបចោលការវាយប្រហារ និងការទម្លាក់គ្រាប់បែកលើអ៊ីរ៉ង់ ស្របពេលដែលអនុស្សរណៈបញ្ចប់ អាចនឹងត្រូវចុះហត្ថលេខា នៅចុងសប្ដាហ៍នេះ
វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានឲ្យដឹងថា លោកបានលុបចោលការវាយប្រហារតាមកាលវិភាគ និងការទម្លាក់គ្រាប់បែកប្រឆាំងនឹងអ៊ីរ៉ង់ នៅល្ងាចថ្ងៃព្រហស្បតិ៍ ដោយលើកឡើងពីវឌ្ឍនភាពនៃការចរចា ដែលកំពុងដំណើរការ។ លោកបានឲ្យដឹងថា សហរដ្ឋអាមេរិក «ទើបតែបានដោះស្រាយសង្គ្រាមជាមួយអ៊ីរ៉ង់យ៉ាងល្អ» ដោយកិច្ចព្រមព្រៀងមួយត្រូវបានគេរំពឹងថា នឹងត្រូវបានចុះហត្ថលេខា «ក្នុងរយៈពេលប៉ុន្មានថ្ងៃខាងមុខ»។
លោក ត្រាំ បានប្រាប់អ្នកយកព័ត៌មាននៅឯសេតវិមានថា លោករំពឹងថាពិធីចុះហត្ថលេខាមួយ ដែលមានការចូលរួមពីអនុប្រធានាធិបតីអាមេរិកលោក JD Vance នឹងធ្វើឡើងនៅអឺរ៉ុប នៅចុងសប្តាហ៍នេះ។ ប្រធានាធិបតីអាមេរិករូបនេះ បានសរសេរនៅលើបណ្ដាញ Truth Social របស់លោកថា “ដោយផ្អែកលើការពិតដែលថាការពិភាក្សាជាមួយសាធារណរដ្ឋអ៊ីស្លាមអ៊ីរ៉ង់ ត្រូវបាននាំយកទៅកម្រិតខ្ពស់បំផុតនៃថ្នាក់ដឹកនាំអ៊ីរ៉ង់ និងត្រូវបានអនុម័ត ខ្ញុំក្នុងនាមជាប្រធានាធិបតីនៃសហរដ្ឋអាមេរិក បានលុបចោលការវាយប្រហារតាមកាលវិភាគ និងការទម្លាក់គ្រាប់បែកប្រឆាំងនឹងអ៊ីរ៉ង់នៅល្ងាចនេះ”។
លោកបានលើកឡើងថា “ការពិភាក្សា និងចំណុចចុងក្រោយត្រូវបានអនុម័តទាំងគំនិត និងលម្អិតដោយគ្រប់ភាគីពាក់ព័ន្ធទាំងអស់ រួមទាំងសហរដ្ឋអាមេរិក អ៊ីស្រាអែល អារ៉ាប៊ីសាអូឌីត អារ៉ាប់រួម កាតា តួកគី ប៉ាគីស្ថាន បារ៉ែន គុយវ៉ែត ហ្ស៊កដានី អេហ្ស៊ីប និងប្រទេសដទៃទៀត”។
ប៉ុន្តែលោកប្រធានាធិបតីបានកត់សម្គាល់ថា ការបិទផ្លូវកងទ័ពជើងទឹករបស់សហរដ្ឋអាមេរិកនឹង “នៅតែមានសុពលភាព និងមានប្រសិទ្ធភាពពេញលេញ” រហូតដល់ប្រតិបត្តិការត្រូវបានបញ្ចប់ ដោយបន្ថែមថាពេលវេលា និងទីកន្លែងនៃការចុះហត្ថលេខានឹងត្រូវបានប្រកាសថា នឹងធ្វើឡើងនៅក្នុងប្រទេសមួយនៅអឺរ៉ុប នៅចុងសប្ដាហ៍នេះ។
នៅព្រឹកថ្ងៃព្រហស្បតិ៍ម្សិលមិញនេះ លោក ត្រាំ បានសន្យាថានឹងបើកការវាយប្រហារ «ធំជាង និងខ្លាំងជាងមុន» ប្រឆាំងនឹងអ៊ីរ៉ង់ នៅយប់នោះ ហើយគ្រប់គ្រងកោះ Kharg ដែលគ្រប់គ្រងការនាំចេញប្រេងជាង ៩០ ភាគរយរបស់អ៊ីរ៉ង់៕
ប្រែសម្រួល ឈូក បូរ៉ា
