មុនការចរចានៅស្វីស លោក ត្រាំ គំរាមវាយប្រហារអ៊ីរ៉ង់ម្តងទៀត និងដណ្តើមយកច្រកសមុទ្រហ័រមូស មកកាន់កាប់
វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យ បានគំរាមកំហែងអ៊ីរ៉ង់លើច្រកសមុទ្រហ័រមូស ខណៈដែលការចរចា រវាងប្រទេសទាំងពីរបានចាប់ផ្តើមនៅប្រទេសស្វីស។
លោក ត្រាំ បានប្រាប់ Fox News ក្នុងបទសម្ភាសន៍តាមទូរស័ព្ទថា សហរដ្ឋអាមេរិក «អាចនឹងដណ្តើមយកច្រកសមុទ្រនេះ ប្រសិនបើយើងត្រូវធ្វើ»។
ប្រធានាធិបតីអាមេរិករូបនេះ បានលេីកឡេីងថា លោកបានប្រាប់មន្ត្រីអ៊ីរ៉ង់ពេញមួយយប់ថា «បើអ្នកបិទវា អ្នកនឹងមិនមានប្រទេសទេ»។ លោកប្រធានាធិបតីមិនបានបញ្ចេញឈ្មោះជនជាតិអ៊ីរ៉ង់ ដែលលោកបាននិយាយជាមួយនោះទេ។
លោក បានបន្ដថា ប្រសិនបើការចរចាជាមួយអ៊ីរ៉ង់ បរាជ័យ ទីក្រុងវ៉ាស៊ីនតោននឹងយកពន្ធ ២០ភាគរយលើប្រេង ដែលឆ្លងកាត់ផ្លូវទឹក ថាមពលសកលដ៏សំខាន់នេះ។ ប្រហែលមួយភាគប្រាំ នៃការផ្គត់ផ្គង់ប្រេងរបស់ពិភពលោកបានឆ្លងកាត់ច្រកសមុទ្រនេះ មុនពេលសហរដ្ឋអាមេរិក និងអ៊ីស្រាអែល បើកការវាយប្រហារ ដ៏ធំលើអ៊ីរ៉ង់នៅថ្ងៃទី២៨ ខែកុម្ភៈ។
ទីក្រុងតេអេរ៉ង់ បានប្រកាស នៅថ្ងៃសៅរ៍សប្ដាហ៍មុនថា ខ្លួនកំពុងបិទច្រកសមុទ្រនេះ ដោយសារតែការវាយប្រហារ ជាបន្តបន្ទាប់របស់អ៊ីស្រាអែលលើប្រទេសលីបង់។
នៅថ្ងៃអាទិត្យ លោក ត្រាំ ក៏បានព្រមានផងដែរថា អ៊ីរ៉ង់អាចនឹងប្រឈមមុខនឹងការវាយប្រហារស្រដៀងគ្នា ឬខ្លាំងជាងនេះ ប្រសិនបើវាមិនបញ្ឈប់ក្រុមហេសបូឡា ពីការបង្កបញ្ហានោះទេ៕
ប្រែសម្រួល ឈូក បូរ៉ា
