បារាំងប្រកាសថា មានអ្នកស្លាប់ដល់ទៅ៥នាក់ ដោយសាររលកកំដៅខ្លាំង ដែលកំពុងវាយប្រហារតំបន់អឺរ៉ុប
បរទេស៖យោងតាមការចេញផ្សាយរបស់ RT យ៉ាងហោចណាស់មនុស្ស៥នាក់ បានស្លាប់នៅក្នុងប្រទេសបារាំង កាលពីថ្ងៃអាទិត្យ និងថ្ងៃចន្ទ ខណៈដែលសីតុណ្ហភាពឡើងដល់ ៤២អង្សានៅក្នុងផ្នែកខ្លះនៃប្រទេសនេះ ចំពេលរលកកំដៅដ៏ធ្ងន់ធ្ងរបាន វាយប្រហារភាគច្រើននៃទ្វីបអឺរ៉ុប។
ក្នុងចំណោមជនរងគ្រោះមានកុមារពីរនាក់ ដែលមានអាយុ២និង៤ឆ្នាំ ដែលត្រូវបានគេរកឃើញថា បានស្លាប់នៅក្នុងរថយន្តគ្រួសាររបស់ពួកគេនៅក្នុងទីក្រុង Carpentras ភាគខាងត្បូងកាលពីថ្ងៃចន្ទ។ ព្រះរាជអាជ្ញាបាននិយាយថា ការប៉ះនឹងកម្ដៅគឺជាមូលហេតុដែលគេសង្ស័យថាបណ្ដាលឲ្យស្លាប់។
មួយថ្ងៃមុននេះ មនុស្សចាស់៣នាក់ត្រូវបានគេរកឃើញថាបានស្លាប់នៅក្នុងផ្ទះរបស់ពួកគេនៅជាយក្រុងនៃទីក្រុង Bordeaux ដែលជាអភិបាល ក្នុងតំបន់ Sophie Brocas បានប្រាប់ France 3 ។ អ្នកឆ្លើយតបបន្ទាន់ត្រូវ បានគេរាយការណ៍ថាបានភ្ជាប់ការស្លាប់ទៅនឹងកំដៅខ្លាំងនេះដូចគ្នាដែរ។
មកទល់ពេលនេះយ៉ាងហោចណាស់មនុស្ស ១៣នាក់ទៀតបានលង់ទឹកស្លាប់កាលពីចុងសប្តាហ៍ ខណៈដែលហ្វូងមនុស្ស បានប្រមូលផ្តុំគ្នាទៅកាន់ឆ្នេរ ទន្លេ បឹង និងអាងហែលទឹក ដើម្បីស្វែងរកការសង្គ្រោះ ពីសីតុណ្ហភាពដ៏ក្ដៅគគុក។
អាជ្ញាធរបានចេញការជូនដំណឹង អំពីរលកកម្តៅពណ៌ក្រហម ដែលជាកម្រិតខ្ពស់បំផុតនៅទូទាំង ជាងពាក់កណ្តាល នៃប្រទេសបារាំង ខណៈដែលរថភ្លើងរាប់សិបគ្រឿង ត្រូវបានលុបចោល ហើយថ្នាក់រៀនរាប់ពាន់ ត្រូវបានពន្យារពេល ឬផ្លាស់ប្តូរទីតាំង ដោយសារតែអាកាសធាតុខ្លាំងហួសហេតុពេក៕
ប្រែសម្រួល៖ស៊ុនលី
