ប្រមុខអង្គការសហប្រជាជាតិ ជំរុញឧ្យមានឆន្ទៈនយោបាយ ដើម្បីពន្លឿន និងបញ្ចប់ការប្រយុទ្ធប្រឆាំង នឹងមេរោគអេដស៍ទូទាំងពិភពលោក
អង្គការសហប្រជាជាតិ ៖ អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យមានឆន្ទៈនយោបាយដើម្បីពន្លឿន និងបញ្ចប់ការប្រយុទ្ធប្រឆាំង នឹងមេរោគអេដស៍ទូទាំងពិភពលោក នៅក្នុងកិច្ចប្រជុំកម្រិតខ្ពស់ នៃមហាសន្និបាតអង្គការសហប្រជាជាតិ។
លោក Guterres បានឧ្យដឹងនៅក្នុងសេចក្តីថ្លែងការណ៍មួយ ដែលថ្លែងដោយលោកស្រី Amina Mohammed អគ្គលេខាធិការរងអង្គការសហប្រជាជាតិ នៅក្នុងកិច្ចប្រជុំពេញអង្គនៃកិច្ចប្រជុំកម្រិតខ្ពស់ ស្តីពីមេរោគអេដស៍/ជំងឺអេដស៍ថា “នេះគឺជាកិច្ចប្រជុំមួយដែលកំពុងប្រព្រឹត្តទៅ ដើម្បីស្វែងរកដំណោះស្រាយ និងអំពាវនាវឱ្យមានឆន្ទៈនយោបាយម្តងទៀត ដើម្បីពន្លឿន និងបញ្ចប់ការប្រយុទ្ធប្រឆាំងនឹងមេរោគអេដស៍ទូទាំងពិភពលោក”។
លោក Guterres បានលេីកឡេីងថា ក្នុងរយៈពេល ៤៥ឆ្នាំចាប់តាំងពីករណីជំងឺអេដស៍ដំបូង ត្រូវបានរាយការណ៍ ពិភពលោកបានបង្ហាញ ពីដំណោះស្រាយ និងសាមគ្គីភាពមិនធម្មតា ដែល “មិនមែនជារឿងងាយស្រួលនោះទេ”។
លោកបានបន្ដថា ដោយសារការប្តេជ្ញាចិត្តផ្នែកនយោបាយ និងការតាំងចិត្តដែលបង្ហាញដោយរដ្ឋាភិបាល និងការវិនិយោគរបស់ដៃគូសកល ការស្លាប់ដោយសារជំងឺអេដស៍ ត្រូវបានកាត់បន្ថយចំនួន ៧០ភាគរយចាប់តាំងពីកម្រិតកំពូលរបស់ខ្លួននៅឆ្នាំ២០០៤ និងចំនួន ៥៤ភាគរយនៅឆ្នាំ២០១០។
យោងតាមលោកអគ្គលេខាធិការ សេវាបង្ការ និងព្យាបាលជំងឺអេដស៍បានកាត់បន្ថយការឆ្លងថ្មីចំនួន ៤០ភាគរយចាប់តាំងពីឆ្នាំ២០១០ ហើយសព្វថ្ងៃនេះ មនុស្សជាង ៣២លាននាក់ដែលរស់នៅជាមួយនឹងជំងឺអេដស៍កំពុងទទួលបានការព្យាបាលដោយថ្នាំប្រឆាំងមេរោគអេដស៍ ដែលអាចសង្គ្រោះជីវិតបាន៕
ប្រែសម្រួល ឈូក បូរ៉ា
