កប៉ាល់ដឹកទំនិញមួយគ្រឿង រងការវាយប្រហារដោយគ្រាប់ផ្លោងនៅច្រកសមុទ្រ Hormuz បន្ទាប់ពីការព្រមានរបស់អ៊ីរ៉ង់
បរទេស៖ អង្គការសមុទ្រអន្តរជាតិរបស់អង្គការសហប្រជាជាតិ បានផ្អាកប្រតិបត្តិការរបស់ខ្លួន ដើម្បីអមដំណើរនាវាឆ្លងកាត់ច្រកសមុទ្រ Hormuz កាលពីថ្ងៃព្រហស្បតិ៍ បន្ទាប់ពីនាវាមួយគ្រឿងបានរាយការណ៍ថាបានរងការវាយប្រហារ ដែលបានបង្កឲ្យមានក្តីបារម្ភឡើងវិញអំពីថាតើកិច្ចព្រមព្រៀងបឋមដើម្បីបញ្ចប់សង្គ្រាមអ៊ីរ៉ង់ នឹងមានសុពលភាពឬអត់។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២៦ ខែមិថុនា ឆ្នាំ២០២៦ថា ទីភ្នាក់ងារកងទ័ពជើងទឹកអង់គ្លេស UKMTO បានផ្សាយថា នាវាដឹកទំនិញដែលរងការវាយប្រហារ បានឱ្យដឹងថា ខ្លួនត្រូវបានវាយប្រហារជិតប្រទេសអូម៉ង់ដោយគ្រាប់ផ្លោងមួយ ប៉ុន្មានម៉ោងបន្ទាប់ពីទីក្រុងតេអេរ៉ង់បានព្រមាននាវាកុំឲ្យ ធ្វើដំណើរតាមផ្លូវដែលខ្លួនមិនបានអនុម័ត។
មន្ត្រីអាមេរិកពីររូបបានប្រាប់ទីភ្នាក់ងារព័ត៌មាន រ៉យទ័រ ថា អ៊ីរ៉ង់បានបាញ់ទៅលើនាវា ខណៈអាជ្ញាធរច្រកសមុទ្រឈូងសមុទ្រពែក្សរបស់អ៊ីរ៉ង់ ដែលទីក្រុងតេអេរ៉ង់បានបង្កើតឡើង ដើម្បីគ្រប់គ្រងសំណើសម្រាប់ នាវាធ្វើដំណើរឆ្លងកាត់ច្រកសមុទ្រនេះ បាននិយាយថា នាវានៅខាងក្រៅផ្លូវដែលខ្លួនបានកំណត់ នឹងមិនត្រូវបានធានាថា នឹងឆ្លងកាត់ដោយសុវត្ថិភាពឡើយ។
អាជ្ញាធរអ៊ីរ៉ង់បាននិយាយថា “ផលវិបាកដែលកើតចេញពីការឆ្លងកាត់ តាមផ្លូវដែលគ្មានការអនុញ្ញាត នឹងជាការទទួលខុសត្រូវរបស់ម្ចាស់ ប្រតិបត្តិករ និងមេបញ្ជាការនាវា”។
ប្រភពចំនួនបួនបានកំណត់អត្តសញ្ញាណនាវានេះថាជា Ever Lovely ដែលមានទង់ជាតិសិង្ហបុរី។ ប្រភពសន្តិសុខមួយបាននិយាយថា នាវាទំនងជាត្រូវបានកំណត់គោលដៅដោយយន្តហោះគ្មានមនុស្សបើក។
មិនមានការអត្ថាធិប្បាយភ្លាមៗពីរដ្ឋាភិបាលអាមេរិកទេ។ សហរដ្ឋអាមេរិក ប្រធានាធិបតី ដូណាល់ ត្រាំ បានព្រមានកាលពីដើមខែនេះថា ប្រសិនបើអ៊ីរ៉ង់មិនគោរពកិច្ចព្រមព្រៀង ដែលមានគោលបំណងបញ្ចប់សង្គ្រាម និងបើកច្រកសមុទ្រឡើងវិញទេ សហរដ្ឋអាមេរិកទំនងជានឹងត្រលប់ទៅទម្លាក់គ្រាប់បែកលើប្រទេសនេះម្តងទៀត។
ប្រែសម្រួលៈ ណៃ តុលា
