រថយន្តភីកអាប់ បើកបរដោយក្មេងជំទង់ម្នាក់ បើកបំបុកព្រះសង្ឃ បណ្តលឱ្យសុគត៨អង្គ និងរបួសធ្ងន់ ១៣អង្គ នៅខេត្ត មុកដាហាន ប្រទេសថៃ
បរទេស៖ ព្រះសង្ឃប្រាំបីអង្គបានសុគត និង ១៣អង្គផ្សេងទៀតបានរងរបួសធ្ងន់ធ្ងរ បន្ទាប់ពីរថយន្តភីកអាប់មួយគ្រឿងបានបុកក្រុមព្រះសង្ឃដែលកំពុងធ្វើធម្មយាត្រានៅខេត្ត មុកដាហាន ភាគឦសានប្រទេសថៃ នៅថ្ងៃព្រហស្បតិ៍ នេះបើយោងតាមការលើកឡើងរបស់ប៉ូលីស។
យោងតាមសារព័ត៌មាន Khaosod English ចេញផ្សាយនៅថ្ងៃទី២ ខែកក្កដា ឆ្នាំ២០២៦ថា គ្រោះថ្នាក់ចរាចរណ៍នេះបានកើតឡើងនៅម៉ោងប្រហែល ១២:០០ នៅលើចិញ្ចើមផ្លូវមួយកន្លែងក្នុងភូមិបានណាស៊ីនួន ស្រុកមឿង។ ក្រុមអ្នកជួយសង្គ្រោះ ប៉ូលីស និងអ្នកឆ្លើយតបបន្ទាន់បានប្រញាប់ប្រញាល់ទៅកាន់កន្លែងកើតហេតុ ជាកន្លែងដែលព្រះសង្ឃត្រូវបានគេប្រទះឃើញនៅលើផ្លូវ និងចិញ្ចើមផ្លូវ។ ព្រះសង្ឃប្រាំអង្គត្រូវបានប្រកាសថាសុគតនៅកន្លែងកើតហេតុ ខណៈដែលបីអង្គទៀតក្រោយមកសុគតនៅក្នុងមន្ទីរពេទ្យ។ ព្រះសង្ឃរងរបួសចំនួន ១៣អង្គត្រូវបានបញ្ជូនទៅមន្ទីរពេទ្យក្បែរនោះដើម្បីព្យាបាលបន្ទាន់។
ការស៊ើបអង្កេតបឋមរបស់ប៉ូលីសបានរកឃើញថា រថយន្តភីកអាប់នេះត្រូវបានបើកបរដោយក្មេងជំទង់ម្នាក់ ដែលត្រូវបានគេចោទប្រកាន់ថាបានបើកបររថយន្តដោយគ្មានការអនុញ្ញាតពីឪពុកម្តាយ ឬអាណាព្យាបាល មុនពេលបុកជាមួយក្បួនដង្ហែរបស់ព្រះសង្ឃ។ អាជ្ញាធរបានធានាសុវត្ថិភាពកន្លែងកើតហេតុ និងកំពុងប្រមូលភស្តុតាង សម្ភាសន៍សាក្សី និងស៊ើបអង្កេតមូលហេតុនៃការគ្រោះថ្នាក់ ហើយ ការស៊ើបអង្កេតកំពុងបន្ត៕
ប្រែសម្រួលៈ ណៃ តុលា
