លោក គីម ជុងអ៊ុន ចុះត្រួតពិនិត្យដោយផ្ទាល់ លេីការបាញ់សាកល្បងមីស៊ីលនាំផ្លូវ ដែលបាញ់ចេញពីនាវាពិឃាតជំនាន់ថ្មីរបស់ខ្លួន
ព្យុងយ៉ាង៖ មេដឹកនាំកូរ៉េខាងជើង គីម ជុងអ៊ុន បានសង្កេតមើលការបាញ់មីស៊ីលផ្លោង និងការធ្វើតេស្តអាវុធផ្សេងទៀតរបស់នាវាចម្បាំងមួយគ្រឿង រួមទាំងកាំភ្លើងធំកងទ័ពជើងទឹក កាំភ្លើងយន្តស្វ័យប្រវត្តិ និងប្រព័ន្ធសង្គ្រាមអេឡិចត្រូនិក ដោយបញ្ជាឱ្យវាត្រូវបានដាក់ឱ្យដំណើរការក្នុងរយៈពេលពីរខែ នេះបើយោងតាមប្រព័ន្ធផ្សព្វផ្សាយរដ្ឋកូរ៉េខាងជេីង។
ការធ្វើតេស្តប្រព័ន្ធប្រយុទ្ធ របស់នាវាពិឃាត Kang Kon ទម្ងន់ ៥០០០តោន ត្រូវបានធ្វើឡើងនៅថ្ងៃសុក្រ បន្ទាប់ពីទីក្រុងព្យុងយ៉ាង បានដាក់ឱ្យដំណើរការនាវាចម្បាំងមួយទៀត គឺ Choe Hyon នៅចុងខែមិថុនា ដែលជាផ្នែកមួយនៃកិច្ចខិតខំប្រឹងប្រែង របស់ខ្លួនក្នុងការជំរុញសមត្ថភាពប្រយុទ្ធ របស់កងទ័ពជើងទឹក។
លោក គីម ជុងអ៊ុន បានត្រួតពិនិត្យសមត្ថភាពរកឃើញគោលដៅ និងដំណើរការព័ត៌មានរបស់នាវា Kang Kon ក៏ដូចជាប្រព័ន្ធអាវុធរួមបញ្ចូលគ្នារបស់វា។ យោងតាមទីភ្នាក់ងារសារព័ត៌មានកណ្តាលកូរ៉េ លោកបានបញ្ជាក់ពីភាពជឿជាក់នៃអំណាចប្រយុទ្ធរបស់នាវាចម្បាំង ប្រឆាំងនាវាមុជទឹក និងប្រឆាំងយន្តហោះ។
មេដឹកនាំកំពូលកូរ៉េខាងជេីងរូបនេះ បានអំពាវនាវឱ្យមានការសាងសង់នាវាចម្បាំងធំៗចំនួនពីរប្រចាំឆ្នាំ ក្រោមផែនការអភិវឌ្ឍន៍ការពារជាតិរយៈពេល ៥ឆ្នាំរហូតដល់ឆ្នាំ២០៣០ រួមទាំងនាវាចម្បាំងទម្ងន់ ១០០០០តោន និងការសាងសង់មូលដ្ឋានកងទ័ពជើងទឹកធំៗ និងពហុមុខងារ ដែលអាចផ្ទុកនាវាទាំងនោះបាន៕
