មនុស្សរាប់ពាន់នាក់ តវ៉ាប្រឆាំងសកម្មភាពកាន់តែច្រើន នៃវិស័យយោធា ដែលកំពុងកើនឡើង ក្នុងរដ្ឋាភិបាលទីក្រុងតូក្យូ
បរទេស៖យោងតាមការ ចេញផ្សាយរបស់ RT ក្រុមបាតុកររាប់ពាន់នាក់ បានប្រមូលផ្តុំគ្នានៅខាងក្រៅសភា របស់ប្រទេសជប៉ុន ក្នុងទីក្រុងតូក្យូ កាលពីថ្ងៃអាទិត្យដើម្បីប្រឆាំង នឹងផែនការរបស់នាយករដ្ឋមន្ត្រី ជប៉ុនលោកស្រី Sanae Takaichi ក្នុងការកែប្រែរដ្ឋ ធម្មនុញ្ញសន្តិភាព របស់ប្រទេស និងពង្រីកសមត្ថភាពយោធា របស់ខ្លួន។
មនុស្ស២៥៩០០០នាក់ដែលត្រូវបានគេរាយការណ៍ថាបានចូលរួមបានអំពាវនាវឱ្យលាលែងពីតំណែងរបស់ Takaichi ហើយបានបដិសេធផែនការ របស់នាងក្នុងការបង្កើន ការចំណាយ លើវិស័យការពារជាតិ បន្ធូរបន្ថយការរឹតបន្តឹង លើការនាំចេញអាវុធ និង បង្កើតច្បាប់ដែលពួកគេនិយាយថា អាចធ្វើឱ្យសេរីភាពស៊ីវិល ចុះខ្សោយ។
ការប្រមូលផ្តុំគ្នានេះបានធ្វើឡើងបន្ទាប់ពីមានការតវ៉ាដូចគ្នាកាលពីមុននៅក្នុងរដ្ឋធានីរបស់ប្រទេសជប៉ុនដែលត្រូវបានគេរាយការណ៍ថាបានចូលរួមដោយមនុស្ស៥០០០០នាក់ នៅក្នុងខែឧសភា ២៦០០០នាក់ នៅថ្ងៃទី១៩ ខែមិថុនា និង២៧០០០នាក់ នៅថ្ងៃទី១០ ខែកក្កដា នេះបើយោងតាមអ្នករៀបចំ។
បាតុកម្មបានផ្តោតលើការស្នើវិសោធនកម្មមាត្រា ៩ របស់លោកស្រី Takaichi ដែលបោះបង់ចោលសង្គ្រាម និងការប្រើកម្លាំងដើម្បីដោះស្រាយជម្លោះ
អន្តរជាតិ។ គណបក្សប្រជាធិបតេយ្យសេរីដែលកំពុងកាន់អំណាចចង់បន្ថែមឃ្លាដែលទទួលស្គាល់យ៉ាងច្បាស់អំពីកងកម្លាំងស្វ័យការពារ និងអនុញ្ញាតឱ្យ
មានវិធានការដែលចាត់ទុកថាចាំបាច់ដើម្បីប្រឆាំងនឹងការគំរាមកំហែងសន្តិសុខជាតិ ដែលលោកស្រី Takaichi អះអាងថាមកពីប្រទេសចិន និង
កូរ៉េខាងជើង។
ក្រុមអ្នករិះគន់បានអះអាងថា ការផ្លាស់ប្តូរនេះ អាចធ្វើឲ្យការរឹតបន្តឹង លើសកម្មភាពយោធាចុះខ្សោយ បង្វែរកងកម្លាំងស្វ័យការពារ ទៅជាកងទ័ពធម្មតា និងធ្វើឱ្យវាកាន់តែងាយ ស្រួលសម្រាប់ទីក្រុងតូក្យូ ក្នុងការចូលរួមក្នុងជម្លោះនៅក្រៅប្រទេស៕
ប្រែសម្រួល៖ស៊ុនលី
