តម្លៃប្រេងធ្លាក់ចុះ ៤% បន្ទាប់ពីសហរដ្ឋអាមេរិក និងអ៊ីរ៉ង់ បានផ្អាកការប្រយុទ្ធគ្នា ក្នុងអំឡុងពេលចុងសប្តាហ៍
បរទេស៖ តម្លៃប្រេងបានធ្លាក់ចុះ ៤% នៅថ្ងៃចន្ទ បន្ទាប់ពីសហរដ្ឋអាមេរិក និងអ៊ីរ៉ង់បានផ្អាកការវាយប្រហារក្នុងអំឡុងពេលចុងសប្តាហ៍ បន្ទាប់ពីការវាយប្រហាររយៈពេលពីរសប្តាហ៍ ដែលបានបង្កើនក្តីសង្ឃឹមនៃដំណោះស្រាយការទូតដែលអាចទម្លាក់ចោលភាពតានតឹង និងអនុញ្ញាតឱ្យការដឹកជញ្ជូនតាមសមុទ្រចាប់ផ្តើមឡើងវិញនៅក្នុងច្រកសមុទ្រ Hormuz។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២៧ ខែកក្កដា ឆ្នាំ២០២៦ថា ប្រេងឆៅ Brent បានធ្លាក់ចុះ ៣,៩៦ ដុល្លារ ឬ ៤,១% មកត្រឹម ៩២,៨២ ដុល្លារ បន្ទាប់ពីបានធ្លាក់ចុះយ៉ាងខ្លីក្រោមដែនគាំទ្រសំខាន់តម្លៃ ៩០ ដុល្លារ កាលពីដើមវគ្គជួញដូរ។
ប្រេងឆៅស្តង់ដារអាមេរិក West Texas Intermediate ស្ថិតនៅតម្លៃ ៨៥,២៩ ដុល្លារក្នុងមួយបារ៉ែល ធ្លាក់ចុះ ៤,០២ ដុល្លារ ឬ ៤,៥%។ កិច្ចសន្យាទាំងពីរនេះកំពុងជួញដូរនៅកម្រិតទាបបំផុតក្នុងរយៈពេលជិតមួយសប្តាហ៍ បន្ទាប់ពីបានកើនឡើងសម្រាប់រយៈពេលបីសប្តាហ៍កន្លងមកនេះ។
ប្រេង Brent ធ្លាប់បានឡើងដល់ ១០០ ដុល្លារក្នុងមួយបារ៉ែល នៅពេលដែលជម្លោះដែលបានកាត់បន្ថយការដឹកជញ្ជូនប្រេងតាមច្រកសមុទ្រ Hormuz បានរាលដាលដល់សមុទ្រក្រហម ដែលារារាំងការនាំចេញពីប្រទេសនាំចេញប្រេងធំជាងគេលើពិភពលោក គឺប្រទេសអារ៉ាប៊ីសាអូឌីត ឆ្លងកាត់ច្រកសមុទ្រ Bab el-Mandeb ទៅកាន់ទ្វីបអាស៊ី។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Mike Waltz បានប្រាប់សារព័ត៌មាន “Fox News Sunday” និងប្រព័ន្ធផ្សព្វផ្សាយអាមេរិកផ្សេងទៀតថា ប្រធានាធិបតីអាមេរិក លោក Donald Trump បានសម្រេចចិត្តផ្អាកការវាយប្រហាររបស់សហរដ្ឋអាមេរិក ដើម្បីផ្តល់ពេលវេលាបន្ថែមទៀតសម្រាប់ការទូត។
ចំណែកក្រុមអ្នកវិភាគរបស់ ING បានលើកឡើងក្នុងកំណត់ត្រាអតិថិជនថា៖ “តម្លៃប្រេងបានធ្លាក់ចុះយ៉ាងខ្លាំងនៅដើមដំបូងនៃការជួញដូរ ដោយសារសហរដ្ឋអាមេរិក និងអ៊ីរ៉ង់ បានរារាំងមិនឱ្យមានសកម្មភាពយោធាបន្ថែមទៀត ដែលផ្តល់នូវសញ្ញាជាក់ស្តែងដំបូង នៃការថយចុះភាពតានតឹងដ៏មានសក្តានុពល”។
ប្រែសម្រួលៈ ណៃ តុលា
