តួគីចាប់ខ្លួនក្រុមមន្ត្រីក្រុង២៣នាក់ នៅក្នុងប្រតិបត្តិការប្រឆាំង នឹងអំពើពុករលួយ
បរទេស ៖ ទីភ្នាក់ងារចិនស៊ិនហួចេញផ្សាយនៅថ្ងៃនេះបានឲ្យដឹងថា អាជ្ញាធរតួកគីកាលពីថ្ងៃពុធ បានឃុំខ្លួនមន្ត្រីក្រុងចំនួន២៣ នាក់រួមទាំងអភិបាលក្រុង Istanbul មួយរូបនៅក្នុងប្រតិបត្តិការប្រឆាំង អំពើពុករលួយពីរដាច់ដោយឡែកពីគ្នា ដែលផ្តោតលើភាពមិនប្រក្រតី ដែលត្រូវបានចោទប្រកាន់នៅក្នុងរដ្ឋបាលក្នុងតំបន់។
នៅក្នុងសង្កាត់ Uskudar នៃទីក្រុង Istanbul ប៉ូលីសបានឃាត់ខ្លួនជនសង្ស័យចំនួន៦នាក់ រួមទាំងអភិបាលស្រុក Sinem Dedetas ផងដែរ។
ប្រតិបត្តិការនេះត្រូវបានចាប់ផ្តើម ដោយការិយាល័យរដ្ឋអាជ្ញាសាធារណៈ Istanbul Anatolian ដែលជាផ្នែកមួយនៃការស៊ើបអង្កេត លើការចោទប្រកាន់ពីបទសូកប៉ាន់ និងការជំរិតទារប្រាក់ ដែលពាក់ព័ន្ធនឹងការចេញលិខិត អនុញ្ញាតសាងសង់ និងការកាន់កាប់។
ដោយឡែកនៅខេត្ត Usak ភាគខាងលិច ការិយាល័យរដ្ឋអាជ្ញាសាធារណៈបានបញ្ជាឱ្យឃុំខ្លួនមន្ត្រីក្រុងចំនួន ១៧ នាក់ ក្នុងប្រតិបត្តិការសម្របសម្រួល។ ជនសង្ស័យត្រូវបានចោទ ប្រកាន់ពីបទក្លែង បន្លំចុះបញ្ជីបុគ្គលជាបុគ្គលិក នៃក្រុមហ៊ុនបុត្រសម្ព័ន្ធរបស់សាលាក្រុង Usak ដើម្បីទទួលបានអត្ថប្រយោជន៍សន្តិសុខសង្គម។
អាជ្ញាធរបាននិយាយថា គម្រោងនេះបានធ្វើឱ្យសាធារណៈជនខាតបង់ថវិកាប្រមាណ ១៦,៨៦ លានលីរ៉ាស តួគីឬប្រហែលជា៣៦ ម៉ឺនដុល្លារអាមេរិក៕
ប្រែសម្រួល៖ស៊ុនលី
