សហរដ្ឋអាមេរិក ហាមឃាត់ការនាំចូល ពីក្រុមហ៊ុនចំនួន ៤៣ បន្ថែមទៀត ជុំវិញការចោទប្រកាន់ថា ប្រទេសចិនបានបង្ខំ ឱ្យធ្វើការពាក់ព័ន្ធនឹង ជនជាតិអ៊ុយហ្គួរ
បរទេស៖ សហរដ្ឋអាមេរិក នៅថ្ងៃសុក្របានហាមឃាត់ការនាំចូលពីក្រុមហ៊ុនចំនួន ៤៣ បន្ថែមទៀតពីប្រទរសចិន ពីបទរំលោភសិទ្ធិមនុស្សលើ ជនជាតិអ៊ុយហ្គួរ និងក្រុមជនជាតិភាគតិចដទៃទៀត រួមទាំងក្រុមហ៊ុន Hunan Aihua Group ដែលជាក្រុមហ៊ុនផលិតឧបករណ៍ ផ្ទុកថាមពលធំជាងគេមួយរបស់ប្រទេសចិន, នេះបើយោងតាមការបង្ហោះរបស់រដ្ឋាភិបាល។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១ ខែសីហា ឆ្នាំ២០២៦ថា ក្រុមហ៊ុនទាំងនេះត្រូវបានបន្ថែម ទៅក្នុងបញ្ជីអង្គភាពច្បាប់បង្ការការងារបង្ខំរបស់ជនជាតិអ៊ុយហ្គួរ ដែលរឹតត្បិតការនាំចូលទំនិញដែលភ្ជាប់ទៅនឹងអ្វីដែលសហរដ្ឋអាមេរិកបានកំណត់ថា ជាការរំលោភសិទ្ធិមនុស្សរបស់ប្រទេសចិន និងការប្រល័យពូជសាសន៍ដែលកំពុងបន្តនៅក្នុងតំបន់ស៊ីនជាំង។
ការបន្ថែមចុងក្រោយបំផុតក៏រួមបញ្ចូលទាំងក្រុមហ៊ុននៅក្នុងវិស័យផលិតឱសថ លោហធាតុ កប្បាស អាហារ និងលីចូមផងដែរ។
ការដាក់ប្រកាសនេះគឺជាលើកដំបូងដែលក្រុមហ៊ុននានាត្រូវបានបន្ថែមទៅក្នុងបញ្ជីក្រោមរដ្ឋបាលលោក Trump ហើយនាំឲ្យចំនួនអង្គភាពនៅក្នុងបញ្ជីនេះកើនឡើងពី ១៤៤ ដល់ ១៨៧។ នេះក៏ជាចំនួនអង្គភាពច្រើនបំផុតដែលត្រូវបានបន្ថែមក្នុងសកម្មភាពមួយចាប់តាំងពីច្បាប់នេះត្រូវបានចុះហត្ថលេខាជាច្បាប់ក្នុងខែធ្នូ ឆ្នាំ ២០២១។ ក្រុមហ៊ុននៅក្នុងបញ្ជីនេះទទួលបានសម្ភារៈពីតំបន់ ស៊ីនជាំង ឬធ្វើការជាមួយរដ្ឋាភិបាលនៅទីនោះដើម្បីជ្រើសរើស និងដឹកជញ្ជូនជនជាតិអ៊ុយហ្គួរនិងក្រុមដែលត្រូវបានធ្វើទុក្ខបុកម្នេញផ្សេងទៀតចេញពីតំបន់។
ប្រែសម្រួលៈ ណៃ តុលា
