ភ្លើងឆេះព្រៃនៅជិតទីក្រុង Spokane រដ្ឋ Washington បានបំផ្លាញអគារជាង ៧០០ ខ្នង និងបង្ខំឱ្យមនុស្ស ៦៤.០០០ នាក់ភៀសខ្លួនចេញ
បរទេស៖ ភ្លើងឆេះព្រៃដែលកំពុង ឆាបឆេះនៅជាយក្រុង Spokane រដ្ឋ Washington សហរដ្ឋអាមេរិកសម្រាប់ថ្ងៃទីបី បានបំផ្លាញអគារយ៉ាងហោចណាស់ ៧០០ និងបង្ខំមនុស្សរាប់ម៉ឺននាក់ឱ្យរត់គេចខ្លួនចេញពីផ្ទះសម្បែងរបស់ពួកគេនៅក្នុង និងជុំវិញទីក្រុងដែលមានប្រជាជនច្រើនបំផុតទីពីររបស់រដ្ឋ នេះបើយោងតាមមន្ត្រីបាននិយាយកាលពីថ្ងៃចន្ទ។
យោងតាមសារព័ត៌មាន រ៉យទ័រ ចេញផ្សាយ នៅថ្ងៃទី៤ ខែសីហា ឆ្នាំ២០២៦ថា ភ្លើងឆេះព្រៃចំនួនបីកន្លែងត្រូវ បានចាត់ថ្នាក់ជាអាទិភាពពន្លត់អគ្គីភ័យ កំពូលនៅក្នុងសហរដ្ឋអាមេរិកទាំងមូល រួមទាំងតំបន់ភាគពាយ័ព្យ ប៉ាស៊ីហ្វិកដែលស្ងួតហួតហែង ជាកន្លែងដែលភ្លើងឆេះព្រៃធំៗ រាប់សិបកន្លែងបានឆេះ អស់រយៈពេលជាច្រើន សប្តាហ៍មកហើយ ដែលធ្វើឱ្យគុណភាពខ្យល់កាន់តែយ៉ាប់យ៉ឺននៅទូទាំងតំបន់ធំទូលាយ។
ភ្លើងឆេះព្រៃនៅតំបន់ Spokane បានឆេះបំផ្លាញផ្ទៃដីជាង ៣.២០០ ហិកតា ចាប់តាំងពីផ្ទុះឡើង នៅថ្ងៃសៅរ៍នៅលើគែមខាងជើងនៃទីក្រុង ដែលជាជម្រករបស់ប្រជាជនប្រហែល ២៣០.០០០ នាក់នៅភាគខាងលិចនៃជើងភ្នំ Rocky Mountain ជិតព្រំដែនរដ្ឋ Idaho។
វីដេអូពីតំបន់ភ្លើងឆេះបានបង្ហាញពីផ្សែង កំពុងលូនកាត់ដើមឈើ ខណៈដែលយន្តហោះបានហោះពីលើ ដោយទម្លាក់សារធាតុរាវពណ៌ក្រហមឆ្អៅទៅលើអណ្តាតភ្លើង។
ផ្សែងដ៏សន្ធោសន្ធៅបានហុយឡើង លើមេឃភាគខាងជើងនៃទីក្រុង ខណៈដែលអណ្តាតភ្លើងបានលេប ត្របាក់ដីព្រៃឈើចម្ងាយ ១០ គីឡូម៉ែត្រ) ពីទីប្រជុំជននៃទីក្រុង Spokane។ នៅកន្លែងផ្សេងទៀត ផ្ទះជាយក្រុងស្ថិតនៅក្នុងគំនរបាក់បែកដែលមានផ្សែងនៅចន្លោះដើមឈើដែលឆេះខ្លោច។ វីដេអូមួយទៀតបានបង្ហាញពីភ្លើងកំពុងឆេះតាមបណ្តោយជួរភ្នំព្រៃឈើនៅពីលើផ្ទះដែលនៅជាប់គ្នា។
ប្រែសម្រួលៈ ណៃ តុលា
