ប្រតិបត្តិការយោធាអ៊ីស្រាអែល បង្កការរំខានដល់ជីវិត ជនស៊ីវិលនៅតំបន់ហ្គាហ្សា
អង្គការសហប្រជាជាតិ៖ ប្រតិបត្តិការយោធាអ៊ីស្រាអែល នៅតំបន់ហ្គាហ្សា កំពុងបង្ករំខានដល់ជីវិតជនស៊ីវិល បំផ្លាញជម្រក និងបង្កើនការផ្លាស់ទីលំនៅ នេះបើយោងតាមអ្នកជំនាញ ការមនុស្សធម៌របស់អង្គការសហប្រជាជាតិ។
ការិយាល័យសម្របសម្រួលកិច្ចការមនុស្សធម៌ របស់អង្គការសហប្រជាជាតិ (OCHA) បានឧ្យដឹងថា ឈើ ខ្សែពួរ ភ្លើងពន្លឺព្រះអាទិត្យ និងឧបករណ៍ ជាច្រើនទៀតត្រូវតែត្រូវបានអនុញ្ញាតឱ្យចូលទៅក្នុងតំបន់នេះទាន់ពេលវេលា ដើម្បីបង្កើនជំនួយ និងអនុវត្តការ ធ្វើឱ្យប្រសើរឡើងបន្ថែមទៀតដល់ជម្រកបណ្តោះអាសន្ន ខណៈដែលប្រតិបត្តិការ កំពុងរឹតត្បិតការទទួលបានសេវាកម្មជួយសង្គ្រោះជីវិតមនុស្ស។
លោក Ramiz Alakbarov អនុប្រធានសម្របសម្រួលពិសេសរបស់អង្គការសហប្រជាជាតិ សម្រាប់ដំណើរការសន្តិភាពមជ្ឈិមបូព៌ា ដែលក៏បម្រើការជាអ្នកសម្របសម្រួលមនុស្សធម៌ សម្រាប់ទឹកដីប៉ាឡេស្ទីនដែលកាន់កាប់ផងដែរ កាលពីថ្ងៃអង្គារបានសម្តែងការព្រួយបារម្ភអំពីការវាយប្រហារតាមអាកាសរបស់អ៊ីស្រាអែលថ្មីៗនេះនៅតំបន់ហ្គាហ្សា ដែលត្រូវបានគេរាយការណ៍ថាបានបណ្តាលឱ្យមានអ្នកស្លាប់ និងរបួសជនស៊ីវិល និងការខូចខាតដល់ការផ្គត់ផ្គង់វេជ្ជសាស្ត្រសំខាន់ៗ និងហេដ្ឋារចនាសម្ព័ន្ធជនស៊ីវិល។
នៅក្នុងការបង្ហោះមួយនៅលើ X លោក Alakbarov បានបញ្ជាក់ជាថ្មីថា សម្ភារៈស៊ីវិល និងមនុស្សធម៌ត្រូវតែការពារ ហើយប្រតិបត្តិការមនុស្សធម៌ត្រូវតែសម្របសម្រួលស្របតាមច្បាប់អន្តរជាតិ។
អង្គការ OCHA បានឧ្យដឹងថា អង្គការសហប្រជាជាតិ និងដៃគូរបស់ខ្លួនកំពុង ឆ្លើយតបគ្រប់ទីកន្លែង និងគ្រប់ពេលវេលា ដែលពួកគេអាចធ្វើបាន ។ កាលពីសប្តាហ៍មុន ក្រុមមនុស្សធម៌បានកែលម្អជម្រកបណ្តោះអាសន្នជិត ៣.០០០ កន្លែងនៅក្នុងទីក្រុងហ្គាហ្សា និងបានចែកចាយជម្រកសង្គ្រោះបន្ទាន់ និងរបស់របរចាំបាច់ដល់គ្រួសារចំនួន ៩.០០០ រួមទាំងសម្ភារៈផ្ទះបាយ ក្រណាត់តង់ ភួយ ពូក ភ្លើងសូឡា និងសម្លៀកបំពាក់៕
ប្រែសម្រួល ឈូក បូរ៉ា
