រុស្ស៊ី ច្រានចោលការទាមទារ អធិបតេយ្យភាព របស់ជប៉ុន លើប្រជុំកោះ គូរីលភាគខាងត្បូង
មូស្គូ៖ អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានឧ្យដឹងថា កោះគូរីលភាគខាងត្បូង ដែលត្រូវបានគេស្គាល់ថា ជាទឹកដីភាគខាងជើងនៅក្នុងប្រទេសជប៉ុន «ដែលពីមុនធ្លាប់ ហេីយនឹងនៅតែជាទឹកដី របស់រុស្ស៊ី»។
លោកបានបន្ថែមទៀតថា វោហាសាស្ត្រ របស់នាយករដ្ឋមន្ត្រីជប៉ុនលោកស្រី Sanae Takaichi ដែលអះអាងថាកោះទាំងនេះ «ជារបស់ជប៉ុនតាំងពីរដេីមមក» នឹងមិនផ្លាស់ប្តូរអ្វីទាំងអស់។
នៅថ្ងៃព្រហស្បតិ៍ លោកស្រី Takaichi «បានតវ៉ាយ៉ាងខ្លាំង» ចំពោះដំណើរទស្សនកិច្ចរបស់ប្រធានាធិបតីរុស្ស៊ី លោក វ្លាឌីមៀ ពូទីន ទៅកាន់កោះ ដែលមានជម្លោះមួយក្នុងចំណោមកោះទាំងនេះ។
ថ្លែងនៅក្នុងសន្និសីទសារព័ត៌មានមួយនៅទីក្រុងតូក្យូ លោកស្រី Takaichi បានលេីកឡេីងថា ជប៉ុនអាច «មិនទទួលយកទាំងស្រុង» ចំពោះដំណើរទស្សនកិច្ចនេះ ដោយទទូចថា ទឹកដីភាគខាងជើងគឺជា «ទឹកដីដែលមានដើមកំណើត» របស់ជប៉ុន។
លោក Medvedev បានលេីកឡេីងថា លោកស្រី Takaichi «អាចនិយាយបានច្រើនតាមដែលលោកស្រី ចូលចិត្តអំពីកោះគូរីលភាគខាងត្បូង ដែលជារបស់ជប៉ុនតាំងពីរដេីមមក»។
លោកបានបន្ដថា អ្នកណាដែលមិនទទួលស្គាល់កោះគូរីលភាគខាងត្បូងជាទឹកដីរបស់រុស្ស៊ី នឹងប្រឈមមុខនឹងផលវិបាកដ៏គួរឲ្យរន្ធត់ចំពោះការយល់ច្រឡំរបស់ពួកគេ។
ទីក្រុងមូស្គូ និងទីក្រុងតូក្យូ បានបរាជ័យក្នុងការ ចុះហត្ថលេខាលើសន្ធិសញ្ញាសន្តិភាពក្រោយសង្គ្រាម ដោយសារតែការទាមទារទឹកដី ប្រកួតប្រជែងលើកោះប៉ាស៊ីហ្វិកទាំងបួន។
បន្ទាប់ពីប្រទេសជប៉ុន បានចូលរួមទណ្ឌកម្មដឹក នាំដោយលោកខាងលិច ប្រឆាំងនឹងរុស្ស៊ី ក្រសួងការបរទេសរុស្ស៊ី បានប្រកាសនៅឆ្នាំ២០២២ ថា ទីក្រុងមូស្គូ នឹងបញ្ឈប់ការចរចាសន្ធិសញ្ញា សន្តិភាពជាមួយប្រទេសជប៉ុន និងបញ្ចប់ការធ្វើដំណើរដោយគ្មានទិដ្ឋាការ សម្រាប់ពលរដ្ឋជប៉ុន ទៅកាន់កោះដែលមានជម្លោះ៕
ប្រែសម្រួល ឈូក បូរ៉ា
