មន្ត្រីជាន់ខ្ពស់កូរ៉េខាងជើង អះអាងថា គ្មានដំណឹងអំពីការទំនាក់ទំនងរវាងមេដឹកនាំកូរ៉េខាងជើង និងអាមេរិក នោះទេ
ព្យុងយ៉ាង៖ ទីភ្នាក់ងារសារព័ត៌មានកណ្តាលកូរ៉េ (KCNA) បានរាយការណ៍ថា លោកស្រី គីម យូជុង ប្រធាននាយកដ្ឋាន នៃគណៈកម្មាធិការកណ្តាល នៃគណបក្សពលករកូរ៉េ បានឧ្យដឹងថា លោកស្រី មិនបានដឹងអំពីការទំនាក់ទំនងថ្មីៗរវាងមេដឹកនាំ នៃសាធារណរដ្ឋប្រជាមានិតប្រជាធិបតេយ្យកូរ៉េ និងសហរដ្ឋអាមេរិកនោះទេ ។
KCNA បានឧ្យដឹងនៅក្នុងរបាយការណ៍របស់ខ្លួនថា លោកស្រី គីម ក៏បានឧ្យដឹងផងដែរថា គោលនយោបាយអរិភាពរបស់សហរដ្ឋអាមេរិក ចំពោះប្រទេសរបស់លោកស្រី មិនបានផ្លាស់ ប្តូរទេ ដោយសារសហរដ្ឋអាមេរិក និងអ្នកគាំទ្ររបស់ខ្លួនបានធ្វើសកម្មភាព យោធាអរិភាពដោយហិង្សាប្រឆាំងនឹងកូរ៉េខាងជើង។
ទោះបីជាមេដឹកនាំនៃប្រទេសទាំងពីរបានរក្សាទំនាក់ទំនង “ល្អឥតខ្ចោះ” ក៏ដោយ លោកស្រីបានសង្កត់ធ្ងន់ថា វា “សមហេតុផល សមស្រប និងចាំបាច់” សម្រាប់កូរ៉េខាងជើង ក្នុងការចាត់វិធានការក្នុងសិទ្ធិអធិបតេយ្យភាពរបស់ខ្លួន ដើម្បីទប់ស្កាត់កងកម្លាំងអរិភាពពីការគំរាមកំហែងសន្តិសុខរបស់ខ្លួន ៕
ប្រែសម្រួល ឈូក បូរ៉ា
