ប្រធានាធិបតីអ៊ីរ៉ង់ ៖ វាជាការប្រសើរ ក្នុងការបញ្ចប់សង្គ្រាម ខណៈដែលអ៊ីរ៉ង់ កំពុងស្ថិតក្នុងទីតាំងដ៏រឹងមាំ
តេអេរ៉ង់៖ ប្រធានាធិបតីអ៊ីរ៉ង់ លោក Masoud Pezeshkian បានឧ្យដឹងថា វាជាការប្រសើរជាងក្នុងការបញ្ចប់សង្គ្រាមឥឡូវនេះ ខណៈដែលអ៊ីរ៉ង់ កំពុងស្ថិតក្នុងទីតាំងនៃ “អំណាច និងសេចក្តីថ្លៃថ្នូរ”។
លោក Pezeshkian បានធ្វើការកត់សម្គាល់នៅក្នុងមហាសន្និបាតលើកទី៣១ នៃសមាគមអ៊ីស្លាមនៃសមាគមវេជ្ជសាស្ត្រអ៊ីរ៉ង់ នៅរដ្ឋធានីតេអេរ៉ង់ ជាកន្លែងដែលលោកបានសង្កត់ធ្ងន់ថា សង្គ្រាមជាមួយសហរដ្ឋអាមេរិក ត្រូវតែបញ្ចប់នៅចំណុចណាមួយ នេះបើយោងតាមសេចក្តីថ្លែងការណ៍មួយ ដែលបានចេញផ្សាយនៅលើគេហទំព័រការិយាល័យរបស់លោក។
លោកបានលេីកឡេីងថា “វាជាការប្រសើរជាងក្នុងការបញ្ចប់សង្គ្រាមនៅថ្ងៃនេះ នៅពេលដែលយើងស្ថិតក្នុងទីតាំងនៃអំណាច និងសេចក្តីថ្លៃថ្នូរ ហើយពិភពលោកទាំងមូលទទួលស្គាល់ជ័យជម្នះរបស់យើង ហើយសង្កត់ធ្ងន់ថា សហរដ្ឋអាមេរិក ដែលរំលោភលើបទប្បញ្ញត្តិ (អន្តរជាតិ) ទាំងអស់ បានវាយប្រហារសាលារៀន មន្ទីរពេទ្យ និងហេដ្ឋារចនាសម្ព័ន្ធរបស់យើង ហើយត្រូវបានគេស្អប់ខ្ពើមនៅក្នុងពិភពលោក”។
លោកបានពិពណ៌នាអំពីអនុស្សរណៈនៃការយោគយល់គ្នា (MoU) ដែលបានចុះហត្ថលេខារវាងអ៊ីរ៉ង់ និងសហរដ្ឋអាមេរិកកាលពីខែមិថុនាថា «ជាកិត្តិយស និងមានតម្លៃ» ដោយសង្កត់ធ្ងន់ថា គ្មានបទប្បញ្ញត្តិណាមួយនៃអនុស្សរណៈនៃការយោគយល់គ្នានេះបង្ហាញពីការចុះចាញ់នោះទេ ហើយកាតព្វកិច្ចទាំងអស់ធ្លាក់ទៅលើភាគីម្ខាងទៀត។
លោកបានកត់សម្គាល់ថា អ្វីដែលសម្រេចបានក្នុងអំឡុងពេលចរចាជាមួយសហរដ្ឋអាមេរិក គឺជា «សមិទ្ធផលដ៏អស្ចារ្យ» ដែលត្រូវបានអនុម័តដោយ «ឯកភាព និងសាមគ្គីភាព» នៅក្នុងក្រុមប្រឹក្សាសន្តិសុខជាតិកំពូលរបស់អ៊ីរ៉ង់ ហើយសមាជិកទាំងអស់នៃក្រុមប្រឹក្សាបានការពារវាយ៉ាងម៉ឺងម៉ាត់៕
ប្រែសម្រួល ឈូក បូរ៉ា
