កប៉ាល់ដឹកប្រេងធំៗពីរគ្រឿង ដែលដឹកប្រេងរបស់អារ៉ាប៊ីសាអូឌីត ត្រូវបានមីស៊ីលមិនស្គាល់ប្រភពវាយប្រហារ ក្នុងពេលដែលកំពុងធ្វើដំណើរ ចេញឆ្លងកាត់ច្រកសមុទ្រ Hormuz
បរទេស ៖ កប៉ាល់ដឹកប្រេងធំៗពីរគ្រឿង ដែលដឹកប្រេងរបស់អារ៉ាប៊ីសាអូឌីត ត្រូវបានវាយប្រហារដោយគ្រាប់ផ្លោង មិនស្គាល់អត្តសញ្ញាណក្នុងរយៈពេលប៉ុន្មាននាទី ពីគ្នាទៅវិញទៅមក ខណៈពេលដែលកំពុងធ្វើដំណើរចេញឆ្លងកាត់ច្រកសមុទ្រ Hormuz នៅយប់ថ្ងៃច័ន្ទ, នេះបើយោង តាមក្រុមហ៊ុនស៊ើបការណ៍សម្ងាត់ និងតាមដានការដឹកជញ្ជូន Marisks និង Kpler។
យោងតាមសារព័ត៌មាន រ៉យទ័រ ចេញផ្សាយ កាលពីថ្ងៃទី១ ខែកញ្ញា ឆ្នាំ២០២៦ថា ប្រភពពី Marisks បានឱ្យដឹងថា “ឧប្បត្តិហេតុស្ទើរតែកើតឡើង ក្នុងពេលដំណាលគ្នានេះ តំណាងឱ្យការកើនឡើងបន្ថែមទៀត នៅក្នុងបរិយាកាសគំរាមកំហែងនៅក្នុងច្រករបៀងអូម៉ង់”។
ទិន្នន័យរបស់ Kpler បានបង្ហាញថា កប៉ាល់ដឹកប្រេងនីមួយៗបានផ្ទុកប្រេងឆៅអារ៉ាប៊ីសាអូឌីតចំនួន ២ លានបារ៉ែលនៅស្ថានីយ Juaymah កាលពីសប្តាហ៍មុន។ ក្រុមហ៊ុន Saudi Aramco បានបន្តការផ្ទុក និងលក់ប្រេងពីខាងក្នុងច្រកសមុទ្រនៅក្នុងខែសីហា។
ការបិទច្រកសមុទ្រ Hormuz របស់អ៊ីរ៉ង់ និងសហរដ្ឋអាមេរិក បានរារាំងយ៉ាងខ្លាំងដល់ការនាំចេញថាមពលពីឈូងសមុទ្រ ខណៈដែលភាគីទាំងពីរបានព្យាយាមអះអាងអំណាចរបស់ពួកគេលើផ្លូវទឹក។
កិច្ចខិតខំប្រឹងប្រែងរបស់អ្នកសម្របសម្រួល រួមទាំងកាតា និងអូម៉ង់ ដើម្បីសម្របសម្រួលកិច្ចព្រមព្រៀងមួយ ដើម្បីបើកច្រកសមុទ្រឡើងវិញ ដែលផ្ទុកប្រហែលមួយភាគប្រាំនៃការផ្គត់ផ្គង់ប្រេងសកល មុនពេលសហរដ្ឋអាមេរិក និងអ៊ីស្រាអែលបើកការវាយប្រហារលើអ៊ីរ៉ង់ជាងប្រាំមួយខែមុន រហូតមកដល់ពេលនេះ បានបង្ហាញថាមិនទាន់មានលទ្ធផលច្បាស់លាស់នៅឡើយទេ។
ប្រែសម្រួលៈ ណៃ តុលា
