តម្លៃឧស្ម័នអឺរ៉ុប កើនឡើងដល់កម្រិតខ្ពស់ បំផុតក្នុងរយៈពេល ៣ឆ្នាំ
ព្រុចសែល៖ តម្លៃឧស្ម័នធម្មជាតិអឺរ៉ុប បានកើនឡើង ដល់កម្រិតខ្ពស់បំផុតក្នុងរយៈពេលជាង៣ឆ្នាំ ខណៈដែលភាពតានតឹង និងការព្រួយបារម្ភអំពីការ ផ្គត់ផ្គង់ឧស្ម័នធម្មជាតិរាវ (LNG) នៅមជ្ឈិមបូព៌ាបានបន្ថែមសម្ពាធដល់ទីផ្សារ ដែលកំពុងប្រឈមមុខនឹងស្តុកទាបមុនរដូវរងា។
កិច្ចសន្យាអនាគត TTF របស់ប្រទេសហូឡង់ ដែលជាស្តង់ដារសម្រាប់ឧស្ម័នអឺរ៉ុប បានកើនឡើងដល់ ៨០.៩៩អឺរ៉ូ (ប្រហែល ៩៣.៩ដុល្លារអាមេរិក) ក្នុងមួយមេហ្គាវ៉ាត់ម៉ោង ក្នុងអំឡុងពេលជួញដូរ ដោយលើសពី ៨០អឺរ៉ូជាលើកដំបូងចាប់តាំងពីដើមឆ្នាំ២០២៣។ ក្រោយមកតម្លៃ បានថយចុះមកត្រឹមប្រហែល ៧៩អឺរ៉ូ (ប្រហែល ៩១.៦ដុល្លារ) ក្នុងមួយមេហ្គាវ៉ាត់ម៉ោង។
ការកើនឡើងនេះបានកើតឡើង ដោយសារតែការរំខានដល់ការផ្គត់ផ្គង់ឧស្ម័នធម្មជាតិរាវ (LNG) ពីមជ្ឈិមបូព៌ា និងការព្រួយបារម្ភថ្មីៗអំពីហេដ្ឋារចនាសម្ព័ន្ធ ឧស្ម័នរបស់រុស្ស៊ី បានធ្វើឱ្យទស្សនវិស័យផ្គត់ផ្គង់កាន់តែតឹងរ៉ឹង។
យោងតាម Gas Infrastructure Europe ដែលតាមដានកម្រិតផ្ទុកឧស្ម័ននៅទូទាំងតំបន់ កន្លែងផ្ទុកឧស្ម័នរបស់សហភាពអឺរ៉ុប មានចំនួន ៦៧.១ភាគរយពេញ គិតត្រឹមថ្ងៃទី៨ ខែកញ្ញា ដែលទាបជាងកម្រិតធម្មតា។
Euronews បានរាយការណ៍ថា ជម្លោះនៅមជ្ឈិមបូព៌ាបានជំរុញឱ្យតម្លៃឧស្ម័នអឺរ៉ុបកើនឡើង ដោយបង្កើនការព្រួយបារម្ភអំពីការផ្គត់ផ្គង់ឧស្ម័នធម្មជាតិរាវ (LNG) តាមរយៈច្រកសមុទ្រហ័រមូស ខណៈដែលថ្លៃថាមពលខ្ពស់កំពុងបន្ថែម សម្ពាធអតិផរណានៅក្នុងតំបន់ចាយប្រាក់អឺរ៉ូ។
ទីភ្នាក់ងារថាមពលអន្តរជាតិ (IEA) បានឧ្យដឹងថា វិបត្តិផ្គត់ផ្គង់ថ្មីៗនេះបានបង្ហាញពីភាពងាយរងគ្រោះនៅក្នុងទីផ្សារឧស្ម័នសកល ដោយព្រមានថា ការប្រកួតប្រជែងសម្រាប់ទំនិញឧស្ម័នធម្មជាតិរាវ (LNG) មានកំណត់ក្នុងអំឡុងពេលនៃភាពតានតឹងស្រួចស្រាវអាចនាំឱ្យមានការប្រែប្រួលតម្លៃខ្លាំង និងផលប៉ះពាល់សេដ្ឋកិច្ចយ៉ាងសំខាន់៕
ប្រែសម្រួល ឈូក បូរ៉ា
