យានគ្មានមនុស្ស បើកក្រោមទឹករបស់សហរដ្ឋអាមេរិកមួយគ្រឿងទៀត ត្រូវបានវាយប្រហារ នៅច្រកសមុទ្រហ័រមូស
តេអេរ៉ង់៖ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានឧ្យដឹងថា កងកម្លាំងជើងទឹករបស់ខ្លួន បានកំណត់គោលដៅលើយានជំនិះ គ្មានមនុស្សបើករបស់សហរដ្ឋអាមេរិក (USV) នៅក្នុងច្រកសមុទ្រហ័រមូស។
នៅក្នុងសេចក្តីថ្លែងការណ៍មួយដែលបានចេញផ្សាយនៅលើសារព័ត៌មានផ្លូវការរបស់ខ្លួន Sepah News IRGC បានឧ្យដឹងថា យាន USV ប្រភេទ Saildrone Explorer កំពុងស្ថិតក្នុង “បេសកកម្មឈ្លានពាន” ហើយត្រូវបានវាយប្រហារនៅច្រកសមុទ្រ។
IRGC បានឧ្យដឹងទៀតថា យានUSV Saildrone Explorer ពីមុនត្រូវបានប្រើប្រាស់នៅក្នុងតំបន់ដោយកងនាវាទី៥ របស់សហរដ្ឋអាមេរិក និងក្រុមការងារទី៥៩ ដែលមានទីស្នាក់ការកណ្តាលនៅប្រទេសបារ៉ែន ដោយបន្ថែមថា មូលដ្ឋានកងទ័ពជើងទឹកសហរដ្ឋអាមេរិកនៅបារ៉ែន ត្រូវបានកំណត់គោលដៅនៅក្នុងការវាយប្រហាររបស់អ៊ីរ៉ង់ ហើយយាន USV ឥឡូវនេះត្រូវបានប្រើប្រាស់ដោយអង្គភាពមួយ ដែលមានមូលដ្ឋាននៅ Khasab ក្នុងប្រទេសអូម៉ង់។
កងកម្លាំង IRGC បានឧ្យដឹងម្តងទៀតថា ច្រកសមុទ្រហ័រមូស ត្រូវបានបិទ និងស្ថិតនៅក្រោមការគ្រប់គ្រងរបស់ខ្លួន ដោយព្រមានថា “វត្តមានអរិភាពណាមួយនៅក្នុងផ្លូវទឹកយុទ្ធសាស្ត្រនឹងត្រូវកំណត់គោលដៅ”។
កងទ័ពជើងទឹក IRGC បានឧ្យដឹងថា កងកម្លាំងរបស់ខ្លួនបានចាប់យកនាវាមុជទឹកគ្មានមនុស្សបើក “ទំនើប និងឆ្លាតវៃបំផុត” មួយគ្រឿងរបស់កងទ័ពសហរដ្ឋអាមេរិក ដែលត្រូវបានកំណត់ថាជា Dive-LD នៅច្រកចូលច្រកសមុទ្រហ័រមូស។
ក្រោយមក យោធាសហរដ្ឋអាមេរិកបានឧ្យដឹងថា យន្តហោះគ្មានមនុស្សបើកក្រោមទឹកមួយគ្រឿងរបស់ខ្លួន “មានបញ្ហា” ក្នុងអំឡុងពេលស្ទង់មើលដែនទឹកក្នុងតំបន់ ដោយមិនបាននិយាយថា ឧបករណ៍នេះត្រូវបានរឹបអូសដោយអ៊ីរ៉ង់ ឬអត់នោះទេ៕
ប្រែសម្រួល ឈូក បូរ៉ា
