លោក Trump និយាយថា លោកនឹងយល់ព្រមជាមួយប្រទេសចិន ក្នុងការសាងសង់រោងចក្រផលិតរថយន្ត នៅសហរដ្ឋអាមេរិក
បរទេស៖ ប្រធានាធិបតីអាមេរិក លោក Donald Trump បានថ្លែងកាលពីថ្ងៃសុក្រថា លោកនឹងមិនជំទាស់នឹងការដែលក្រុមហ៊ុនផលិតរថយន្តរបស់ចិនមកសាងសង់ រោងចក្រផលិតរថយន្តនៅក្នុងសហរដ្ឋអាមេរិកនោះទេ ទោះបីជាមានការជំទាស់យ៉ាងខ្លាំងពីសំណាក់សមាជិកសភា និងក្រុមហ៊ុនផលិតរថយន្តរបស់អាមេរិកក៏ដោយ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១២ ខែកញ្ញា ឆ្នាំ២០២៦ថា លោក Trump បានថ្លែងនៅក្នុងបទសម្ភាសន៍មួយជាមួយកម្មវិធី “The Ingraham Angle” របស់ទូរទស្សន៍ Fox News ថា៖ «ប្រសិនបើប្រទេសចិនចង់មកបើករោងចក្រ ផលិតរថយន្តរបស់ពួកគេនៅទីនេះ ខ្ញុំមិនជំទាស់នឹងរឿងនេះទេ»។
លោកបានបន្តថា៖ «ប្រទេសជប៉ុនក៏ធ្វើបែបនេះដែរ ប៉ុន្តែពួកគេជួលប្រជាជនរបស់យើងឱ្យធ្វើការ។ ចំណុចសំខាន់គឺពួកគេជួលប្រជាជនរបស់យើង»។
លោកបានបន្ថែមថា លោកមិនចង់ឃើញក្រុមហ៊ុនផលិតរថយន្តរបស់ចិន សាងសង់រថយន្តនៅក្នុងប្រទេសម៉ិកស៊ិក ហើយដឹកជញ្ជូនរថយន្តទាំងនោះមកកាន់សហរដ្ឋអាមេរិកនោះទេ។ លោក Trump បានបញ្ជាក់ថា៖ «ខ្ញុំមិនមែនមានបំណងរិះគន់រថយន្តរបស់ចិននោះទេ»។
សូមជម្រាបថា ក្រុមហ៊ុនផលិតរថយន្តរបស់អាមេរិកបានជំរុញឱ្យលោក Trump ដែលគ្រោងនឹងជួបជាមួយប្រធានាធិបតីចិន លោក Xi Jinping នៅទីក្រុងវ៉ាស៊ីនតោនក្នុងរយៈពេលពីរសប្តាហ៍ទៀតនោះ កុំយល់ព្រមអនុញ្ញាតឱ្យក្រុមហ៊ុនផលិតរថយន្ត របស់ចិនចូលមកក្នុងទីផ្សារសហរដ្ឋអាមេរិក ៕
ប្រែសម្រួល: ណៃ តុលា
