លោក ដូណាល់ ត្រាំ ថា លោកនឹងហាមឃាត់ស្ថាប័ន ព័ត៌មានធំៗចំនួនបី គឺ CNN, MSNBC និង Politico មិនឱ្យចូលក្នុងសេតវិមាន
បរទេស៖ ប្រធានាធិបតីអាមេរិក លោក ដូណាល់ ត្រាំ បានថ្លែងកាលពីថ្ងៃសុក្រថា លោកនឹងហាមឃាត់ស្ថាប័នព័ត៌មានធំៗចំនួនបី គឺ CNN, MSNBC និង Politico មិនឱ្យចូលក្នុងសេតវិមានឡើយ ដែលនេះគឺជាការគំរាមកំហែងចុងក្រោយរបស់លោកទៅលើសារព័ត៌មានឯករាជ្យ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១៩ ខែកញ្ញា ឆ្នាំ២០២៦ថា វិធានការនេះទំនងជានឹងប្រឈមមុខនឹងបញ្ហាផ្លូវច្បាប់ ដោយសារអ្នកជំនាញផ្នែកសេរីភាពនៃការបញ្ចេញមតិបានលើកឡើងថា វាផ្ទុយនឹងការការពារសេរីភាពនៃការបញ្ចេញមតិ និងសេរីភាពសារព័ត៌មាន ដែលមានចែងក្នុងវិសោធនកម្មទីមួយនៃរដ្ឋធម្មនុញ្ញសហរដ្ឋអាមេរិក។
លោក ត្រាំ បានចោទប្រកាន់ស្ថាប័នព័ត៌មានទាំងនោះថាបាន «ផ្សព្វផ្សាយព័ត៌មានក្លែងក្លាយ (FAKE NEWS)» នៅក្នុងការបង្ហោះលើបណ្តាញសង្គមមួយ ហើយបានថ្លែងថា ពួកគេ «មិនគួរអាចសរសេរ ឬរាយការណ៍រឿងដែលមិនមែនជាការពិត និងការកុហកជាបន្តបន្ទាប់នោះទេ នៅពេលដែលពួកគេធ្វើសេចក្តីរាយការណ៍អំពីប្រធានាធិបតីសហរដ្ឋអាមេរិក»។ លោក ត្រាំ បានបន្ថែមថា «នឹងមានស្ថាប័នព័ត៌មានក្លែងក្លាយផ្សេងទៀតដែលនឹងត្រូវទទួលវិធានការដូចគ្នានេះ»។
យ៉ាងណាក៏ដោយ គេបានឃើញតំណាងនៃស្ថាប័នព័ត៌មានទាំងបីកំពុងបំពេញការងារនៅក្នុងសេតវិមាននៅរសៀលថ្ងៃសុក្រ បន្ទាប់ពីការបង្ហោះរបស់លោក ត្រាំ។ យោងតាមការរាយការណ៍របស់ Fox News ដែលដកស្រង់សម្តីមន្ត្រីជាន់ខ្ពស់សេតវិមានម្នាក់ដែលមិនបញ្ចេញឈ្មោះ គឺសេតវិមានបានជូនដំណឹងដល់ស្ថាប័នទាំងបីថា ពួកគេនឹងត្រូវបានហាមឃាត់មិនឱ្យចូលក្នុងបរិវេណសេតវិមានចាប់ពីថ្ងៃសៅរ៍តទៅ។
រែសម្រួល: ណៃ តុលា
