រុស្ស៊ី ទប់ស្កាត់ការគំរាមកំហែង តាមប្រព័ន្ធអ៊ីនធឺណិតជាង ១០០ លានដង អំឡុងពេលបោះឆ្នោតសភា
មូស្គូ៖ លោកស្រី Ella Pamfilova ប្រធានគណៈកម្មការ រៀបចំការបោះឆ្នោតកណ្តាល (CEC) របស់រុស្ស៊ី បានឧ្យដឹងថា ប្រទេសរុស្ស៊ី បានទប់ស្កាត់ការគំរាមកំហែង តាមប្រព័ន្ធអ៊ីនធឺណិត (cyber threats) ដែលអាចកើតមានជាង ១០០ លានដង ដែលមានគោលដៅវាយប្រហារ លើហេដ្ឋារចនាសម្ព័ន្ធ នៃការបោះឆ្នោតរបស់ខ្លួន អំឡុងពេលនៃការបោះឆ្នោតសភា (State Duma)។
លោកស្រី Pamfilova បានបញ្ជាក់ថា ប្រព័ន្ធបោះឆ្នោតរបស់រុស្ស៊ី រួមទាំងគេហទំព័រផ្លូវការសម្រាប់ការបោះឆ្នោតផងដែរនោះ បានរងការវាយប្រហារតាមបែប DDoS ក្នុងកម្រិតធំ និងមានសមត្ថភាពខ្ពស់ ព្រមទាំងការប៉ុនប៉ងជ្រៀតចូលម៉ាស៊ីនមេ (web server) ពេញមួយរយៈពេលនៃការបោះឆ្នោត។
អាជ្ញាធរក៏បានរកឃើញការប៉ុនប៉ង ទាញយកផលប្រយោជន៍ពីចំណុចខ្សោយនៃប្រព័ន្ធ និងការប៉ុនប៉ងរំខានដល់ហេដ្ឋារចនាសម្ព័ន្ធ ទូរគមនាគមន៍ជាតិផងដែរ។
សកម្មភាពដែលមានចេតនាអាក្រក់ទាំងអស់ ត្រូវបានកំណត់អត្តសញ្ញាណ និងត្រងយកចេញដោយប្រព័ន្ធសន្តិសុខជាតិ ដោយមិនមានការជ្រៀត ចូលតាមប្រព័ន្ធអ៊ីនធឺណិតណាមួយ ដែលទទួលបានជោគជ័យនោះទេ ទោះបីជាការវាយប្រហារ ទាំងនោះមានកម្រិតធ្ងន់ធ្ងរមិនធ្លាប់មានពីមុនមកក៏ដោយ។
ការស៊ើបអង្កេតបានបញ្ជាក់ថា ការវាយប្រហារតាមប្រព័ន្ធអ៊ីនធឺណិត ដែលមានគោលដៅលើប្រព័ន្ធបោះឆ្នោតតាមអេឡិចត្រូនិកពីចម្ងាយរបស់រុស្ស៊ី ភាគច្រើនមានប្រភពមកពីបរទេស ដោយការវាយប្រហារមួយចំនួនបានប្រើប្រាស់អាសយដ្ឋាន IP របស់រុស្ស៊ីដែលត្រូវបានក្លែងបន្លំ។
លោកស្រីបានរិះគន់យ៉ាងខ្លាំងចំពោះការប៉ុនប៉ងរបស់លោកខាងលិចក្នុងការរំខានដល់ដំណើរការបោះឆ្នោតរបស់រុស្ស៊ី ដោយកត់សម្គាល់ថា ប្រទេសលោកខាងលិចបានប្រមូលផ្តុំក្រុមមេធាវីជំនាញ ដែលប្រៀបដូចជា “សត្វត្មាតស៊ីសាកសពក្នុងការបោះឆ្នោត” ដើម្បីស្វែងរកចន្លោះប្រហោងនៃច្បាប់ ផ្សព្វផ្សាយព័ត៌មានមិនពិត និងរំខានដល់ការងាររបស់គណៈកម្មការ CEC៕
