អារ៉ាប៊ីសាអូឌីត ព្យាករណ៍ថា ការចំណាយ មានរហូតដល់ ៣៧០ ពាន់លានដុល្លារ ខណៈមានចំណូលត្រឹម ៣២០ ពាន់លានដុល្លារសម្រាប់ឆ្នាំ២០២៧
រីយ៉ាដ៖ ក្រសួងហិរញ្ញវត្ថុអារ៉ាប៊ីសាអូឌីត បានប្រកាសសេចក្តីថ្លែងការណ៍បឋមមួយ ស្តីពីថវិកាសម្រាប់ឆ្នាំសារពើពន្ធ ២០២៧ ដោយប៉ាន់ប្រមាណការចំណាយសរុបចំនួន ៣៧០ ពាន់លានដុល្លារអាមេរិក និងចំណូលសរុបប្រហែល ៣២០ ពាន់លានដុល្លារ។
នៅក្នុងសេចក្តីថ្លែងការណ៍មួយនៅលើគេហទំព័រផ្លូវការរបស់ខ្លួន ក្រសួងបានព្យាករណ៍ថាផលិតផល ក្នុងស្រុកសរុបពិតប្រាកដ របស់អារ៉ាប៊ីសាអូឌីត នឹងធ្លាក់ចុះ ៣,៦ ភាគរយនៅឆ្នាំ២០២៦ ដែលបណ្តាលមកពីការធ្លាក់ចុះ ២១,៨ ភាគរយនៃសកម្មភាពទាក់ទងនឹងប្រេង ខណៈដែលសកម្មភាពមិនមែនប្រេងត្រូវបានគេរំពឹងថា នឹងកើនឡើង ៣,២ ភាគរយ។
ក្រសួងបានបន្ថែមថា សកម្មភាពមិនមែនប្រេងបានកើនឡើង ១,៨ ភាគរយនៅក្នុងឆមាសទីមួយនៃឆ្នាំ ២០២៦ ដោយចំណែករបស់វិស័យនេះនៅក្នុង GDP បានកើនឡើងដល់កម្រិតខ្ពស់បំផុតជាប្រវត្តិសាស្ត្រគឺ ៥៧,៣ ភាគរយ។
អត្រាអតិផរណាត្រូវបានព្យាករណ៍ថា នឹងមានប្រហែល ២,១ ភាគរយសម្រាប់ឆ្នាំនេះ ខណៈដែលអត្រាគ្មានការងារធ្វើបានធ្លាក់ចុះមកនៅត្រឹម ៦,៥ ភាគរយនៅក្នុងត្រីមាសទីពីរនៃឆ្នាំ ២០២៦។
រដ្ឋមន្ត្រីហិរញ្ញវត្ថុអារ៉ាប៊ីសាអូឌីត លោក Mohammed Aljadaan បានឧ្យដឹងថា ការប៉ាន់ប្រមាណបឋម សម្រាប់ថវិកាឆ្នាំ ២០២៧ នេះធ្វើឡើងក្នុងបរិបទសេដ្ឋកិច្ចពិភពលោក ដែលមិនប្រាកដប្រជា ដោយលោកបានកត់សម្គាល់ថា ព្រះរាជាណាចក្រនេះនៅតែបន្តគ្រប់គ្រងហិរញ្ញវត្ថុសាធារណៈរបស់ខ្លួនដោយផ្អែកលើទស្សនវិស័យរយៈពេលវែង៕
ប្រែសម្រួល ឈូក បូរ៉ា
