ការដ្ឋានសាងសង់ របស់ចិននៅថ្មប៉ប្រះទឹក Antelope កំពុងពង្រីកក្តីបារម្ភជុំវិញ ការក្តោបក្តាប់អំណាចយោធា នៅសមុទ្រចិនខាងត្បូង
ហុងកុង៖ ការសាងសង់ផ្លូវរត់យន្តហោះ របស់ចិននៅលើថ្មប៉ប្រះទឹក Antelope ក្នុងប្រជុំកោះ Paracels កំពុងដំណើរការយ៉ាងសកម្ម ខណៈដែលអ្នកវិភាគប៉ាន់ស្មានថា ការដ្ឋាននេះអាចនឹងបញ្ចប់នៅពាក់កណ្តាលឆ្នាំ២០២៧ ដែលនេះនឹងពង្រឹងការគ្រប់គ្រងផ្នែកយោធារបស់ទីក្រុងប៉េកាំងលើតំបន់សមុទ្រចិនខាងត្បូងដែលមានវិវាទ នេះបើយោងតាមការចេញផ្សាយពីសារព័ត៌មាន Reuters ថ្ងៃទី២ ខែតុលា ឆ្នាំ២០២៦។
រូបភាពផ្កាយរណបដែលទីភ្នាក់ងារព័ត៌មាន Reuters ទទួលបាន បង្ហាញពីសកម្មភាពឈូសឆាយ គំនរក្រួស បេតុង និងប្រតិបត្តិការគ្រឿងចក្របង្ហាប់ដី ដើម្បីសាងសង់ផ្លូវរត់យន្តហោះខ្នាតធំមួយ។ រូបភាពទាំងនេះ ថតដោយក្រុមហ៊ុនផ្តល់សេវារូបភាពផ្កាយរណប Vantor កាលពីថ្ងៃទី២៥ ខែកញ្ញា ដែលបង្ហាញផងដែរពីទូកដឹកក្រួសពេញឆ្ពោះទៅកាន់កំពង់ផែដែលទើបសាងសង់ថ្មី។ អនុព័ន្ធយោធា និងអ្នកវិភាគសន្តិសុខបានលើកឡើងថា ទីតាំងនេះអាចក្លាយជាមូលដ្ឋានទ័ពក្រៅឆ្នេរដ៏សំខាន់បំផុតមួយរបស់ចិននៅក្នុងតំបន់។
ការបញ្ចប់មូលដ្ឋានទ័ពនៅ Antelope នឹងក្លាយជាការពង្រីកយោធាដ៏សំខាន់បំផុតរបស់ចិននៅសមុទ្រចិនខាងត្បូងក្នុងរយៈពេលមួយទសវត្សរ៍ចុងក្រោយ។ វានឹងពង្រីកវិសាលភាពនៃនាវាចម្បាំង និងយន្តហោះយោធាចិននៅក្នុងតំបន់ផ្លូវទឹក ដែលកំពុងក្លាយជាទីលានប្រកួតប្រជែងយោធាដ៏ក្តៅគគុក រវាងទីក្រុងប៉េកាំង សហរដ្ឋអាមេរិក និងសម្ព័ន្ធមិត្តជុំវិញបញ្ហាតៃវ៉ាន់។
លោក Ben Lewis ស្ថាបនិកទិន្នន័យបើកទូលាយ PLATracker បានលើកឡើងដោយប្រៀបធៀបទៅនឹងការសាងសង់ផ្លូវរត់ប្រវែង ៣គីឡូម៉ែត្រនៅថ្មប៉ប្រះទឹក Fiery Cross (ប្រជុំកោះ Spratly) ក្នុងឆ្នាំ២០១៥ ថា៖ “ខ្ញុំរំពឹងថាផ្លូវរត់នេះនឹងត្រូវចាក់កៅស៊ូបញ្ចប់នៅឆមាសទី១ ឆ្នាំ២០២៧ ហើយការចុះចតលើកដំបូងអាចនឹងធ្វើឡើងនៅពាក់កណ្តាលឆ្នាំ២០២៧ ឬអាចលឿនជាងនេះ ព្រោះពួកគេមានបទពិសោធន៍ ១០ឆ្នាំមកហើយដើម្បីធ្វើការងារនេះឱ្យកាន់តែលឿន។
“យ៉ាងណាមិញ លោកបញ្ជាក់ថា មិនទាន់មានសញ្ញានៃការជីកកកាយសម្រាប់ស្តុកគ្រាប់រំសេវ និងប្រេងឥន្ធនៈនៅឡើយទេ ដែលជាធម្មតាមូលដ្ឋានទ័ពទំហំនេះតម្រូវឱ្យមាន។
ជុំវិញបញ្ហានេះ ក្រសួងការពារជាតិចិនមិនទាន់ឆ្លើយតបនឹងសំណើសុំការអត្ថាធិប្បាយពី Reuters ភ្លាមៗឡើយ។
កន្លងមក ចិនមិនទាន់ទទួលស្គាល់ការសាងសង់មូលដ្ឋានយោធាថ្មីនេះទេ ដោយប្រព័ន្ធផ្សព្វផ្សាយរដ្ឋអះអាងថា ទីតាំងនៅ Antelope នឹងបម្រើដល់តម្រូវការស៊ីវិល ដូចជាការព្យាករណ៍អាកាសធាតុ ការស្រាវជ្រាវលំហសមុទ្រ និងវិទ្យាសាស្ត្រប៉ុណ្ណោះ។
អ្នកវិភាគរូបភាព Vantor និងលោក Damien Symon ដែលជាអ្នកកត់សម្គាល់ឃើញការបូមខ្សាច់តាំងពីដើមខែមករា បានពន្យល់ថា គ្រឿងចក្រដែលគេឃើញ គឺប្រើសម្រាប់បង្ហាប់ដី ឬគ្រឹះមុនពេលចាក់កៅស៊ូ។
នាពេលអនាគត មូលដ្ឋានទ័ព Antelope នៅភាគខាងជើងសមុទ្រចិនខាងត្បូងនេះ នឹងជួយសម្រួលដល់ការដាក់ពង្រាយនាវាចម្បាំង និងយន្តហោះយោធាចិនយ៉ាងទូលំទូលាយ ព្រមទាំងជួយការពារច្រកចូលកោះហៃណាន (Hainan) ដែលជាទីតាំងចិនដាក់ពង្រាយនាវាមុជទឹកបំពាក់មីស៊ីលនុយក្លេអ៊ែររបស់ខ្លួន។ គួរបញ្ជាក់ថា កាលពីចុងខែសីហា Reuters ក៏បានរាយការណ៍ពីការប្រទះឃើញការសាងសង់ថ្មីៗនៅលើកោះតូចមួយ (Yagong Island) ក្បែរថ្មប៉ប្រះទឹក Antelope នេះផងដែរ ប៉ុន្តែអ្នកវិភាគមិនទាន់អាចបញ្ជាក់ពីមុខងារពិតប្រាកដរបស់វាឡើយ៕
ប្រែសម្រួល៖ គីរី
